Angrendagi rezinotexnika zavodi Rossiya kompaniyasiga 80 mln dollarga sotilgan
“Birinchi rezinotexnika zavodi”ning 100 foiz ulushi Rossiyaning “Tatneft” kompaniyasi 80 mln dollarga sotildi. Bu haqda “O‘zkimyosanoat”ning matbuot xizmati xabar bermoqda.
Ta’kidlanishicha, zavodning barcha kredit majburiyatlari hamda mavjud qarzdorliklar hisobga olinib, “Deloitte” kompaniyasi tomonidan qiymati 843 mlrd so‘mga (ekv 75,0 mln dollari) baholangan.
2022-yil 31-dekabrgacha ushbu zavodning 91,8 foiz ulushi “O‘zkimyosanoat” ga va 8,2 foiz ulushi “O‘zkimyoimpeks”ga tegishli edi. Shuningdek, mazkur korxonaning jami 153 mln dollarga teng kredit majburiyatlari hamda qarzdorligi mavjud.
Ma’lumotlarga ko‘ra, 2022-yilning 1—2-dekabr kunlari Samarqand shahrida o‘tkazilgan O‘zbekiston—Rossiya biznes-forumida zavodni mamlakatning “Tatneft” kompaniyasiga 80 mln dollarga sotish yuzasidan kelishuvga erishilgan.
Bunda zavodning 100 foiz ulushini mavjud barcha kredit majburiyatlari va qarzdorliklarini bajarish, kelgusida korxonada yangi turdagi rezinotexnika mahsulotlarini ishlab chiqarishni yo‘lga qo‘yish sharti qo‘yilgan.
Kompaniyaning xabariga ko‘ra, avvalroq Yagona korporativ axborot portaliga joylangan zavodning 91,8 foiz ulushi 826,6 million so‘mga sotilgani haqidagi xabarda raqamlar xato berilgan. Keyinchalik kompaniya postni o‘chirib tashlagan va summa 826,57 mlrd so‘mga tuzatilgan.
Zavod haqida
“Birinchi rezinotexnika zavodi” 2014-yilda tashkil etilgan. 2018-yil iyul oyidan boshlab zavod yillik 100 ming pogon metr konveyer lentalari, 200 ming dona qishloq xoʻjaligi shinalari va 3 million dona avtomobil shinalari ishlab chiqarish quvvatiga ega.
