АҚШда полиция 17 ёшли афғонистонлик йигитга ўқ узди (видео)
АҚШнинг Калифорния штати Трейси шаҳрида полиция афғонистонлик 17 ёшли йигитга икки марта ўқ узди. Бу ҳақда Аl-Arabia хабар берди.
Маълум қилинишича, жабрланувчи ўқ жароҳати билан касалхонага ётқизилган. Йигит пичоқ билан қуроллангани, бошқа эркакни таъқиб қилишга урингани айтилган. Ҳолат юзасидан полиция ходими воқеа жойига келган ва йигитга пичоқни ташлашни буюрган.
Трейси шаҳар полиция бўлими афғонистонлик йигит буйруқни бажармагач, полиция томонидан ўққа тутилганини маълум қилган. Ўсмир пичоқ жароҳати билан яқин атрофдаги касалхонага ётқизилган. Трейси Калифорния полисияси тергов тугагандан сўнг жиноий ҳодиса ҳақида батафсил маълумот беришини маълум қилган.
Америка-Ислом муносабатлари кенгашининг Сакраменто водийси/Марказий Калифорния бўлими ўқ узилган йигит мусулмон эканини билдириб, мустақил тергов ўтказишга чақирган.
“Биз мазкур ташвишли ҳодисани кузатмоқдамиз ва ҳуқуқни муҳофаза қилиш органларидан тўлиқ шаффофлик билан ишлашни ва бу иш бўйича барча фактларни тезда оммага эълон қиладиган мустақил тергов ўтказишни талаб қиламиз", — дейилади Америка-Ислом муносабатлари кенгаши баёнотида.
Аввалроқ АҚШнинг Виржиния штатида бошланғич мактабнинг олти ёшли биринчи синф ўқувчиси ўз ўқитувчисига ўқ узганди. Ўқувчи ва ўқитувчи ўртасида келишмовчилик юзага келган, шундан кейин болакай унга тўппончадан ўқ узган.
Шунингдек, АҚШда ит эгасини милтиқ билан отиб қўйган, оқибатда жабрланувчи вафот этган. Марҳум машинанинг олдинги йўловчи ўриндиғида кетаётган бўлган. Ҳодиса жойига келган шифокорлар эркакни қутқаришга ҳаракат қилган, бироқ у воқеа жойида вафот этган.
