Ukraina prezidenti Vladimir Zelenskiy Jinoyat kodeksiga harbiy holat yoki jangovar vaziyat sharoitida harbiy xizmatchilarning javobgarligini kuchaytirishni nazarda tutuvchi tuzatishlarni ma’qulladi.
Oliy Rada saytida xabar qilinishicha, 13-yanvar kuni deputatlar tomonidan qabul qilingan hujjatga prezident imzo chekkan. Tuzatishlar qabul qilinishi haqida avvalroq Ukraina Qurolli kuchlari bosh qo‘mondoni Valeriy Zalujniy gapirgandi.
Ukraina Jinoyat kodeksiga kiritilgan o‘zgartirishlarga ko‘ra, qo‘mondonga bo‘ysunmaslik, buyruqqa rioya qilmaslik, qo‘mondonga tahdid yoki zo‘ravonlik qilish, harbiy qismni va jang maydonini ruxsatsiz tashlab ketishda ayblangan harbiy xizmatchilarga sudlar jazoni qisqartirish yoki shartli jazo tayinlash huquqiga ega bo‘lmaydi. Bundan tashqari, ma’muriy huquqbuzarliklar, masalan, harbiylarning spirtli ichimlik ichishi uchun jazo muddati oshiriladi.
Ushbu qonun loyihasi hali qabul qilinmasdan turib huquq himoyachilari tomonidan tanqidga uchragandi, u harbiylarning asosiy huquqlari sud tomonidan himoyalanishini sezilarli darajada cheklaydi, deb hisoblanmoqda. O‘zgartirishlarga qarshi petitsiya bir kunda 25 000 dan ortiq ovoz olgan, bu esa uni qayta ko‘rib chiqishga majbur qiladi.
“Urush jinoyatlari to‘g‘risidagi ishlar bo‘yicha hukm chiqarishda sudyalar endi ishning barcha holatlarini hisobga olmaydi. Endi barcha harbiylar — mast holatda xizmat joyini o‘zboshimchalik bilan tark etganlar va chindan ham sog‘lig‘idagi muammolar sabab xizmatga o‘z vaqtida kela olmaganlar uchun bir xil sud amaliyoti qo‘llanadi”, — “CHESNO” inson huquqlari harakati tahlilchisi Viktoriya Oleynik.
Izoh (0)