Украина президенти Владимир Зеленский Жиноят кодексига ҳарбий ҳолат ёки жанговар вазият шароитида ҳарбий хизматчиларнинг жавобгарлигини кучайтиришни назарда тутувчи тузатишларни маъқуллади.
Олий Рада сайтида хабар қилинишича, 13 январь куни депутатлар томонидан қабул қилинган ҳужжатга президент имзо чеккан. Тузатишлар қабул қилиниши ҳақида аввалроқ Украина Қуролли кучлари бош қўмондони Валерий Залужний гапирганди.
Украина Жиноят кодексига киритилган ўзгартиришларга кўра, қўмондонга бўйсунмаслик, буйруққа риоя қилмаслик, қўмондонга таҳдид ёки зўравонлик қилиш, ҳарбий қисмни ва жанг майдонини рухсатсиз ташлаб кетишда айбланган ҳарбий хизматчиларга судлар жазони қисқартириш ёки шартли жазо тайинлаш ҳуқуқига эга бўлмайди. Бундан ташқари, маъмурий ҳуқуқбузарликлар, масалан, ҳарбийларнинг спиртли ичимлик ичиши учун жазо муддати оширилади.
Ушбу қонун лойиҳаси ҳали қабул қилинмасдан туриб ҳуқуқ ҳимоячилари томонидан танқидга учраганди, у ҳарбийларнинг асосий ҳуқуқлари суд томонидан ҳимояланишини сезиларли даражада чеклайди, деб ҳисобланмоқда. Ўзгартиришларга қарши петиция бир кунда 25 000 дан ортиқ овоз олган, бу эса уни қайта кўриб чиқишга мажбур қилади.
“Уруш жиноятлари тўғрисидаги ишлар бўйича ҳукм чиқаришда судьялар энди ишнинг барча ҳолатларини ҳисобга олмайди. Энди барча ҳарбийлар — маст ҳолатда хизмат жойини ўзбошимчалик билан тарк этганлар ва чиндан ҳам соғлиғидаги муаммолар сабаб хизматга ўз вақтида кела олмаганлар учун бир хил суд амалиёти қўлланади”, — “ЧECНО” инсон ҳуқуқлари ҳаракати таҳлилчиси Виктория Олейник.
Изоҳ (0)