Rossiya Xavfsizlik kengashi raisi o‘rinbosari Dmitriy Medvedev dunyo uchinchi jahon urushi xavfiga yaqinlashganini aytdi. Bu haqda “Interfaks” xabar berdi.
“Ukrainadagi ‘maxsus operatsiya’ AQSH tomonidan agressiya tayyorlanishiga javoban majburiy chora edi. Ko‘rinib turibdiki, sodir bo‘layotgan voqealar tufayli dunyo uchinchi jahon urushi xavfiga yaqinlashdi”, — dedi Medvedev.
Uning fikricha, ”ko‘p tomonlama diplomatiya institutlari o‘ta jiddiy inqirozni boshidan kechirmoqda: BMT, birinchi navbatda, yetakchi xalqaro institut sifatida va boshqa xalqaro platformalar bir paytlar nizo hamda ziddiyatli vaziyatlarni hal etish uchun yaratilgan bo‘lsa, hozir ular jang maydonida”.
Shuningdek, Medvedev partiya diplomatiyasini, jumladan SHHT, ASEAN, BRIKS, Afrika ittifoqi va boshqa bir qator platformalar kabi yirik davlatlararo assotsiatsiyalarni rivojlantirish haqida o‘ylash zarurligini aytdi. Bu ko‘p qutbli dunyo tarafdorlarining nufuzli partiyalararo koalitsiyasini shakllantirish imkonini berishini ta’kidladi.
Avvalroq Checheniston rahbari Ramzan Qodirov agar Yevropa va NATO mamlakatlarini xalqaro hamjamiyat va Ukrainadagi nizo ishtirokchilari deb hisoblasa, bo‘layotgan voqealarni uchinchi jahon urushi deb atash mumkinligini aytgan. Biroq keyinroq Rossiya “maxsus operatsiya”siga jahon urushi maqomini berish noo‘rin ekani, chunki “dunyo NATOdan iborat emasligi”, Xitoy, Hindiston, Pokiston kabi ko‘plab yirik mamlakatlar betaraflikni saqlayotganini ta’kidlagan.
O‘z navbatida, Polsha Rossiya tomonidan boshlangan urushda Ukrainaning mag‘lub bo‘lishi uchinchi jahon urushining boshlanishiga olib kelishi mumkinligini bildirgan. Shu uchun Kiyevni qo‘llab-quvvatlashga to‘sqinlik qilishga va ishlarni noma’lum muddatga qoldirishga asos yo‘qligi ilgari surilgan.
Izoh (0)