Ukraina prezidenti Vladimir Zelenskiy turli darajadagi kadrlarni almashtirish rejalari haqida ma’lum qildi. OAV ma’lumotlariga koʻra, prezident ofisi rahbarining oʻrinbosari Kirilo Timoshenko iste’foga chiqqan, yana bir qancha harbiy-fuqarolik maʼmuriyatlari rahbarlari lavozimini tark etishi mumkin. Bundan tashqari, Ispaniyada dam olgani uchun tanqidga uchragan Bosh prokuror o‘rinbosari Aleksey Simonenko iste’foga chiqish haqida ariza yozdi.
“Kadrlar bo‘yicha qarorlar allaqachon qabul qilingan, bu vazirliklar va markaziy hukumatning boshqa tuzilmalari hamda hududlardagi turli darajadagi rahbarlarga, huquqni muhofaza qilish tizimiga tegishli — kimdir bugun, kimdir ertaga”, — dedi Zelenskiy veb-saytida e’lon qilingan murojaatda.
Aynan kimlar iste’foga chiqishi mumkinligi haqida “Ukraina haqiqati” o‘z manbalariga tayanib xabar berdi. Nashrning yozishicha, Timoshenkoning o‘rnini Kiyev viloyati harbiy ma’muriyati rahbari Aleksey Kuleba egallashi mumkin. “Babel” nashriga ko‘ra, Timoshenko viloyat ma’muriyatlaridan birini boshqarishi mumkin. Sumi va Dnepropetrovsk viloyatlari rahbarlari, shuningdek, 2022-yilda Rossiya tomonidan anneksiya qilingan Ukrainaning Zaporojye va Xerson viloyatlari maʼmuriyatlari rahbarlari isteʼfoga chiqishi mumkin.
Bir hafta oldin, Zelenskiy ofisining mustaqil maslahatchisi Aleksey Arestovich o‘z lavozimini tark etgandi. Arestovich Rossiyaning Ukrainaga bosqini boshlanganidan keyin Ukraina hukumatidagi eng taniqli shaxslardan biriga aylangan. U 14-yanvar kuni Dneprdagi turar joy binosiga kelib urilgan Rossiya raketasi Ukraina havo hujumidan mudofaa kuchlari tomonidan urib tushirilgani haqidagi iddaosi tanqidlar ostida qolganidan keyin iste’foga chiqdi.
Izoh (0)