2023-yilning 21-yanvaridan boshlab O‘zbekistonga Turkmanistondan gaz yetkazib berish qayta tiklandi. Bu haqda “Daryo”ga “O‘ztransgaz” matbuot kotibi xabar berdi.
Joriy yilning 12-yanvar kuni Turkmaniston “Daryoliq” stansiyasi orqali O‘zbekistonga tabiiy gaz eksportini to‘xtatgan edi.
O‘sha kuni “Turkmangaz” davlat konsernidan unga qarashli gaz ishlab chiqarish korxonalaridagi muammolar va “Daryoliq” orqali gaz ta’minoti to‘xtatilgani haqida telefonogramma kelib tushgan.
Turli manbalardan olingan ma’lumotlarga ko‘ra, gaz ta’minoti to‘xtatilishiga “Galkanish” gaz kondensati koni ichidagi kommunikatsiyalarida gidrat hosil bo‘lishi sabab bo‘lgan. Mutaxassislar buni kuchli sovuqlarda sodir bo‘ladigan fors-major hodisa deb tushuntirgan.
O‘zbekistonda g‘ayritabiiy sovuqlar va Turkmanistondan gaz yetkazib berishning to‘xtatilishi fonida elektr energiyasida ommaviy uzilishlar, shuningdek, issiqlik ta’minoti va iste’molchilarga gaz ta’minotida uzilishlar kuzatildi.
2023-yil boshida O‘zbekiston Turkmanistondan kuniga 35 million kub metr gaz va kuniga 20–21 million kVt/soatgacha elektr energiyasi import qilishni rejalashtirgan edi.
Avvalroq Serdar Berdimuhamedov muzlagan “Galkinish” konini ko‘zdan kechirib, neft va gaz sanoatiga mas’ul vazir o‘rinbosari Shohim Abdrahmonov va “Turkmangaz” rahbari Botir Amanovga so‘nggi ogohlantirish bilan qattiq tanbeh bergani haqida xabar berilgandi.
Izoh (0)