Tashqi ishlar vaziri vazifasini bajaruvchi Baxtiyor Saidov 22-yanvar kuni Iqtisodiy hamkorlik tashkiloti (IHT) Tashqi ishlar vazirlari kengashining 26-yig‘ilishida ishtirok etish uchun O‘zbekistonga kelgan IHT bosh kotibi Husrav Noziriy bilan uchrashdi.
TIV matbuot xizmatining ma’lum qilishicha, suhbat chog‘ida O‘zbekiston va IHT o‘rtasidagi ko‘p qirrali hamkorlikning bugungi holati va istiqbollari muhokama qilindi. Tashkilot doirasida mintaqaviy hamkorlikni rivojlantirish, uning jahon miqyosidagi nufuzini oshirish yuzasidan fikr almashildi.
Husrav Noziriy Shavkat Mirziyoyev tashabbusi bilan “IHTda o‘zaro bog‘liqlikni mustahkamlash yili” deb e’lon qilingan 2022-yil mobaynida Tashkilotda O‘zbekistonning faol va mazmunli raisligini qayd etdi. O‘zbekiston rahbarining IHT Ashxobod sammitida ilgari surgan qilgan tashabbuslari ijrosi tuzilma faoliyatiga kuchli turtki berishi va yangi “o‘sish nuqtasi” bo‘lishiga ishonch bildirdi.
O‘zbekiston raisligida o‘tkazilgan tadbirlar, jumladan, Hududiy rejalashtirish Kengashi majlisi, qishloq xo‘jaligi va turizm vazirliklari rahbarlarining uchrashuvlari, qayta tiklanuvchi energiya manbalari bo‘yicha uchrashuvlar va boshqalar muhim ahamiyat kasb etgani ta’kidlandi.
Tomonlar “IHT istiqbollari 2025”da belgilangan maqsadlarga erishish uchun Tashkilot doirasidagi o‘zaro hamkorlik salohiyatidan, ayniqsa, savdo, investitsiya, transport-kommunikatsiya, energetika sohalarida yanada samarali foydalanish zarurligi to‘g‘risida umumiy fikr bildirdi.
Yig‘ilishda, shuningdek, Toshkentda bo‘lib o‘tadigan IHT Tashqi ishlar vazirlari kengashi yig‘ilishi, shuningdek, O‘zbekiston raisligi doirasida o‘tkaziladigan boshqa tadbirlarning tashkiliy va mazmuniy jihatlari ham muhokama qilingan.
Izoh (0)