O‘zbekistonda 113 ming nafar bemor onkologik kasallik bilan ro‘yxatda turibdi. Bu haqda sog‘liqni saqlash vaziri Amrillo Inoyatov O‘zAga bergan intervyusida aytib o‘tdi.
“Bugungi kunda mamlakatimizda 113 ming nafar bemor onkologik kasallik bilan ro‘yxatda turadi. Ular muntazam ravishda davolanib kelmoqda. Onkologiya yo‘nalishida eng ustuvor vazifa bu — kasallikni birinchi bosqichida aniqlash. Buning uchun hamma hududlarga zamonaviy mobil mammograflar olib berildi”, — deydi vazir.
Uning ta’kidlashicha, ayollarda uchraydigan bu kasalliklar erta, birinchi bosqichda aniqlansa, bu bilan kurashib, yuz foiz davolasa bo‘ladi.
“Bu bo‘yicha juda katta davlat dasturlari qabul qilingan bo‘lib, ro‘yxatga olingan har bir bemor uchun zarur bo‘lgan barcha turdagi dorilar bilan bepul davlat tomonidan ta’minlab berish choralari ko‘rilmoqda. Bu bemorlarning hammasi markazga kelmasligi, bu yerda sun’iy navbat yuzaga kelmasligini ta’minlaydi. Bemorlar uchun qulaylik yaratish maqsadida hududlarning o‘zida tashxis qo‘yish va davolash choralari ko‘rilyapti”, — degan Amrillo Inoyatov.
Sog‘liqni saqlash vazirining qayd etishicha, bu kasallikka qarshi kurashish uchun Xorazm viloyatida onkologiya dispanseri tashkil etildi. Bugun shu kecha kunduzda 7 ming nafar onkologik bemor Xorazm viloyatiga to‘g‘ri kelyapti. 2019-yilda ularning 3 yarim ming nafari order bilan davolanish uchun poytaxtga qatnagan bo‘lsa, 2020-yilga kelib, bu ikki baravarga kamaydi. Ya’ni bemorlarning markazga kelishi 3 yarim ming nafarga, 1 ming 700 ta orderga kamaydi. 2021-yilda bu raqam 750 taga tushdi va 2022-yilga kelib bor yo‘g‘i 131 tani tashkil etdi.
Onkologiya yo‘nalishi bo‘yicha Toshkent tibbiyot akademiyasi hududida qurilayotgan yangi 650 o‘rinli markaz zamonaviy bo‘lishi kutilyapti. Bu bilan O‘zbekistonda hali joriy qilinmagan 10 ga yaqin texnologiyalar olib kelinyapti, yangi standartlar kirib kelyapti. Bu kabi markazlar nafaqat Toshkentda, balki barcha hududlarda bosqichma-bosqich joriy etilishi belgilab berilgan.
Mavzuga doir: O‘zbekistonda onkologik kasalliklarni davolovchi dorilar ishlab chiqariladi
Izoh (0)