Ўзбекистонда 113 минг нафар бемор онкологик касаллик билан рўйхатда турибди. Бу ҳақда соғлиқни сақлаш вазири Амрилло Иноятов ЎзАга берган интервьюсида айтиб ўтди.
«Бугунги кунда мамлакатимизда 113 минг нафар бемор онкологик касаллик билан рўйхатда туради. Улар мунтазам равишда даволаниб келмоқда. Онкология йўналишида энг устувор вазифа бу — касалликни биринчи босқичида аниқлаш. Бунинг учун ҳамма ҳудудларга замонавий мобил маммографлар олиб берилди», — дейди вазир.
Унинг таъкидлашича, аёлларда учрайдиган бу касалликлар эрта, биринчи босқичда аниқланса, бу билан курашиб, юз фоиз даволаса бўлади.
«Бу бўйича жуда катта давлат дастурлари қабул қилинган бўлиб, рўйхатга олинган ҳар бир бемор учун зарур бўлган барча турдаги дорилар билан бепул давлат томонидан таъминлаб бериш чоралари кўрилмоқда. Бу беморларнинг ҳаммаси марказга келмаслиги, бу ерда сунъий навбат юзага келмаслигини таъминлайди. Беморлар учун қулайлик яратиш мақсадида ҳудудларнинг ўзида ташхис қўйиш ва даволаш чоралари кўриляпти», — деган Амрилло Иноятов.
Соғлиқни сақлаш вазирининг қайд этишича, бу касалликка қарши курашиш учун Хоразм вилоятида онкология диспансери ташкил этилди. Бугун шу кеча кундузда 7 минг нафар онкологик бемор Хоразм вилоятига тўғри келяпти. 2019 йилда уларнинг 3 ярим минг нафари ордер билан даволаниш учун пойтахтга қатнаган бўлса, 2020 йилга келиб, бу икки бараварга камайди. Яъни беморларнинг марказга келиши 3 ярим минг нафарга, 1 минг 700 та ордерга камайди. 2021 йилда бу рақам 750 тага тушди ва 2022 йилга келиб бор йўғи 131 тани ташкил этди.
Онкология йўналиши бўйича Тошкент тиббиёт академияси ҳудудида қурилаётган янги 650 ўринли марказ замонавий бўлиши кутиляпти. Бу билан Ўзбекистонда ҳали жорий қилинмаган 10 га яқин технологиялар олиб келиняпти, янги стандартлар кириб келяпти. Бу каби марказлар нафақат Тошкентда, балки барча ҳудудларда босқичма-босқич жорий этилиши белгилаб берилган.
Мавзуга доир: Ўзбекистонда онкологик касалликларни даволовчи дорилар ишлаб чиқарилади
Изоҳ (0)