Toshkent viloyatining Zangiota tumanida yashovchi aholi vakillari viloyat hokimi Zoir Mirzayev hamda tuman rahbariga murojaat qilib, “Bizning mahalla ham Zangiota tumani xaritasida bormi? Bor bo‘lsa, gazsiz, ‘svet’siz qolgan mahallamizga bir keling”, deya ularni hududga chorladi. Toshkent viloyati hokimligi axborot xizmatining “Daryo”ga bildirishicha, Zoir Mirzayev kecha qilingan murojaatga javoban bugun, 21-yanvar kuni “Turobod” mahallasiga borgan.
Bizning murojaatimiz Toshkent viloyati hokimi Zoir Mirzayev hamda Zangiota tumani hokimiga yo‘llanmoqda. Bizning “Turobod” mahallasi tuman xaritasida bormi yoki yo‘qmi? Bizda qishin-yozin “svet” va gaz muammosi bor. Besh-olti kun sabr qildik, xonadonlarda qariyalar va yoshlar bor. Shu mahallaga bir marotaba bo‘lsa-da, kelganmisiz? Keling mahallaga, bir ko‘ring, — deydi rahbarlarga videomurojaat yo‘llagan fuqarolar.
“Daryo”ning bu haqdagi so‘roviga javob bergan Toshkent viloyati hokimligi axborot xizmatining yozishicha, Zoir Mirzayev fuqarolar murojaatiga javoban bugun, 21-yanvar kuni aynan shu mahallaga borgan.
“Turobod” mahallasida yashovchi bir guruh aholi Toshkent viloyati hamda Zangiota tumani hokimlariga videomurojaat yo‘llab, gaz, “svet”, suv yo‘qligini bildirgandi. Mazkur murojaatga ko‘ra, bugun viloyat hokimi Zoir Mirzayev hamda mutasaddi rahbarlar hududga bordi. Aholi vakillari bilan uchrashib, muammolarni o‘rgandi.Bugungi ob-havo sharoitida gaz bosimi poytaxtga yaqin hududlarda keskin pasayib ketganligi va bu borada viloyatda zaruriy choralar ko‘rilayotgani to‘g‘risida aholiga tushuntirish berilib, elektr ta’minotidagi uzilishlarni bartaraf etish maqsadida yuqori kuchlanishli transformator o‘rnatildi, — deydi hokimlik axborot xizmati xodimi Asqar Ismoilov.
Qo‘shimcha qilinishicha, hududda yonilg‘i tanqisligi sabab aholida jamoat transportiga bo‘lgan ehtiyoj ortgani ham hisobga olinib, viloyat Transport boshqarmasi tomonidan qo‘shimcha avtomobillar ajratilishi ma’lum qilingan.
Izoh (0)