Тошкент вилоятининг Зангиота туманида яшовчи аҳоли вакиллари вилоят ҳокими Зоир Мирзаев ҳамда туман раҳбарига мурожаат қилиб, «Бизнинг маҳалла ҳам Зангиота тумани харитасида борми? Бор бўлса, газсиз, ‘свет'сиз қолган маҳалламизга бир келинг», дея уларни ҳудудга чорлади. Тошкент вилояти ҳокимлиги ахборот хизматининг «Дарё»га билдиришича, Зоир Мирзаев кеча қилинган мурожаатга жавобан бугун, 21 январь куни «Туробод» маҳалласига борган.
Бизнинг мурожаатимиз Тошкент вилояти ҳокими Зоир Мирзаев ҳамда Зангиота тумани ҳокимига йўлланмоқда. Бизнинг «Туробод» маҳалласи туман харитасида борми ёки йўқми? Бизда қишин-ёзин «свет» ва газ муаммоси бор. Беш-олти кун сабр қилдик, хонадонларда қариялар ва ёшлар бор. Шу маҳаллага бир маротаба бўлса-да, келганмисиз? Келинг маҳаллага, бир кўринг, — дейди раҳбарларга видеомурожаат йўллаган фуқаролар.
«Дарё»нинг бу ҳақдаги сўровига жавоб берган Тошкент вилояти ҳокимлиги ахборот хизматининг ёзишича, Зоир Мирзаев фуқаролар мурожаатига жавобан бугун, 21 январь куни айнан шу маҳаллага борган.
«Туробод» маҳалласида яшовчи бир гуруҳ аҳоли Тошкент вилояти ҳамда Зангиота тумани ҳокимларига видеомурожаат йўллаб, газ, «свет», сув йўқлигини билдирганди. Мазкур мурожаатга кўра, бугун вилоят ҳокими Зоир Мирзаев ҳамда мутасадди раҳбарлар ҳудудга борди. Аҳоли вакиллари билан учрашиб, муаммоларни ўрганди.Бугунги об-ҳаво шароитида газ босими пойтахтга яқин ҳудудларда кескин пасайиб кетганлиги ва бу борада вилоятда зарурий чоралар кўрилаётгани тўғрисида аҳолига тушунтириш берилиб, электр таъминотидаги узилишларни бартараф этиш мақсадида юқори кучланишли трансформатор ўрнатилди, — дейди ҳокимлик ахборот хизмати ходими Асқар Исмоилов.
Қўшимча қилинишича, ҳудудда ёнилғи танқислиги сабаб аҳолида жамоат транспортига бўлган эҳтиёж ортгани ҳам ҳисобга олиниб, вилоят Транспорт бошқармаси томонидан қўшимча автомобиллар ажратилиши маълум қилинган.
Изоҳ (0)