АҚШ Украинага Abrams танкларини жўнатсагина, Берлин ҳам Киевга Leopard танкларини етказиб беришга рози бўлади. Бу ҳақда Германия канцлери Олаф Шольц АҚШ президенти Жо Байден билан телефон суҳбатида айтган, деб хабар бермоқда Süddeutsche Zeitung нашри аноним манбаларига, The Wall Street Journal эса Германиянинг юқори мартабали расмийларига таяниб.
Süddeutsche Zeitung нашрининг ёзишича, Байден канцлер билан суҳбатда Abrams танкларини юборишни тасдиқламаган.
Оқ уй матбуот котиби Карин Жан-Пьердан Германиянинг шартлари ҳақида изоҳ сўралганда, у Украинага қурол етказиб бериш бўйича қарорлар давлатларнинг суверен қарорлари эканини айтди.
WSJ нашрига европалик юқори мартабали амалдорнинг айтишича, Германия Leopard етказиб бериш бўйича қарорини катта эҳтимол билан 20 январгача қабул қилмайди — ўша санада Германиянинг Раммштайн базасида Украинага ёрдам кўрсатиш бўйича алоқа гуруҳининг йиғилиши бўлиб ўтади. НАТОнинг бир қанча давлатлари дипломатлари айтишича, учрашувнинг асосий мавзуларидан бири Киевга Leopard бериш масаласи бўлади.
Газетанинг таъкидлашича, Шольц Украинани қурол, жумладан, танклар билан қўллаб-қувватлаш бўйича қарор қабул қилишда Германия дўстлари ва ҳамкорлари билан «стратегик жиҳатдан ўзаро боғланган»ини айтган.
Аввалроқ The New York Times Германия бошқа мамлакатлар битта бўлса ҳам Abrams танкини жўнатган тақдирдагина, Украинани Leopard билан таъминлаши мумкинлигини ёзганди. Хабарга кўра, Берлин ва Вашингтон бу борада фаол музокаралар олиб бормоқда.
CNN ва Politico маълумотларига кўра, 20 январь куни Қўшма Штатлар Украинага энг катта ёрдам пакетини эълон қилади, бироқ унинг таркибидан Abrams танклари жой олмайди.
Изоҳ (0)