Yevropa yahudiylar kongressi Rossiya tashqi ishlar vaziri Sergey Lavrovning bayonotini qoralab, “sharmandali” deb atadi. U avvalroq AQSHning Rossiyaga nisbatan siyosatini Adolf Gitlerning Xolokost davrida olti million yahudiylar o‘limiga sabab bo‘lgan xatti-harakatlariga qiyoslagandi. Kongress vazirdan o‘z gaplari uchun uzr so‘rashni talab qildi.
Lavrov 18-yanvar kuni AQSHning Ukrainaga Rossiya istilosiga qarshi turish uchun yordami doirasidagi xatti-harakatlarini Gitler va Napoleonning harakatlariga o‘xshatdi.
“Xuddi Napoleon Rossiya imperiyasiga qarshi deyarli butun Yevropani safarbar qilgani, Gitler aksariyat Yevropa mamlakatlarini safarbar qilib, egallab olib, bor qurol-aslahasini ko‘tartirib turg‘izib qo‘ygani va ularni Sovet ittifoqiga qarshi tashlagani kabi, hozir AQSH NATOga kiruvchi va Yevroittifoq a’zosi bo‘lgan deyarli barcha yevropaliklardan koalitsiya tuzib, xuddi shu vazifa bilan — ‘Rossiya masalasi’ni uzil-kesil hal qilish uchun mamlakatimizga qarshi urush olib bormoqda”, — dedi vazir.
Yevropa yahudiylar kongressi Lavrovning gaplarida Gitlerning “Yahudiylar masalasining yakuniy yechimi”ga havolani ko‘rdi. Tashkilotdagilar Rossiya tashqi ishlar vazirining gaplaridan “hayratga tushgani va larzaga kelgani”ni ta’kidladi.
“Bu Xolokost tarixining eng oddiy darajada noto‘g‘ri talqin qilinishidir va biz janob Lavrovdan uzr so‘rab, bu izohlarini qaytarib olishcha chaqiramiz”, — dedi kongress prezidenti Ariel Muzikant. Uning qo‘shimcha qilishicha, Rossiya tashqi ishlar vaziri “Xolokost va Gitlerga birinchi marta havola berayotgani yo‘q” va “bunga nuqta qo‘yilishi kerak”.
Oq uyda Lavrovning gaplarini haqoratli deb atashdi. “Bu shunchalik bema’niki, bunga munosabat bildirish ham kerak emas, faqat u bizga Gitler va Xolokost atamalarini yopishtirishga uringan haqiqatda haqoratli xatti-harakatini hisobga olmaganda”, — dedi AQSH prezidenti ma’muriyati huzuridagi Milliy xavfsizlik kengashi koordinatori Jon Kirbi.
Ukrainaning Isroildagi elchixonasi ham Lavrovning iboralarini bema’ni deb topdi: “Rossiya tashqi ishlar vaziri Ikkinchi jahon urushi davridagi Gitlerning jinoyatlariga va Xolokostga ishora qilgan holda navbatdagi tuturuqsiz bayonotini berdi. Lavrov qanchalik ko‘p gapirsa, dunyo rashistlar nafaqat joriy voqelikni, balki mashhur tarixiy kontekstni ham qanchalik buzib ko‘rsatayotganini shunchalik yaqqol ko‘rib bormoqda”.
2022-yil mayida Sergey Lavrov Mediaset telekanaliga bergan intervyusida “Gitlerda yahudiy qoni bo‘lgani”, “eng ashaddiy antisemitlar esa, odatda yahudiylar” ekanini aytgandi. Uning bu gaplari Ukraina prezidenti Vladimir Zelenskiyning kelib chiqishi yahudiy bo‘lishiga qaramasdan, Ukraina hukumati, go‘yoki, natsistlarni qo‘llab-quvvatlayotgani haqidagi kontekstda yangragandi.
Isroil hukumati Lavrovni yolg‘onchilikda va irqchilikda ayblagan, shuningdek, Rossiya elchisi Anatoliy Viktorovni tushuntirish berish uchun chaqirgan edi. Rossiya bosh ravvini Byorl Lazar Lavrovning gaplarini “hayratda qoldiruvchi” deb atab, vazirga uzr so‘rashni taklif qilgandi.
Taxminan shu vaqtda Rossiya Tashqi ishlar vazirligi “Antisemitizm to‘g‘risida” maqola e’lon qilib, unda Isroilni Kiyevda “neonatsistik rejim”ni qo‘llab-quvvatlashda ayblagandi. 4-may kuni idora rasmiy vakili Mariya Zaxarova “isroillik yollanma jangchilar” Ukrainada “‘Azov’ jangarilari bilan yelkama-yelka” jang qilayotganini aytdi.
Oxir-oqibat, Isroil ma’lum qilishicha, Lavrovning izohlari uchun Rossiya prezidenti Vladimir Putin kechirim so‘ragan.
Izoh (0)