Ko‘zni sovuq urishidan himoya qilish uchun nimalarga ahamiyat berish kerak? Mutaxassis tushuntirish berdi

Bir necha haftadan buyon O‘zbekistonda anomal sovuq havo kuzatilmoqda. Bunday sharoitda ko‘zlarni sovuq havodan qanday himoyalash to‘g‘risida “Daryo” muxbiri mutaxassisdan izoh oldi.

Ko‘z shifokori Mehruz Saidovning maslahat berishicha, birinchi galda tashqariga, ya’ni sovuq havoga chiqqan vaqtda ko‘zni ko‘proq yumib-ochish kerak.

“Bunga sabab ko‘z yoshi ko‘zni himoya qilish xususiyatiga ega. Har bir ko‘z yoshi 5-7 soniya oralig‘ida ko‘zlarni sovuqdan asrashga yetadi. Shu bois bir daqiqada odatda ko‘z 16-20 marotaba ochib yumilsa, harorat sovuq vaqtda esa 30-35 marotabaga ochib yumish lozim”, — dedi mutaxassis.

Uning qo‘shimcha qilishicha, ko‘zni himoya qiluvchi tusi o‘zgartirilgan ko‘zoynaklardan foydalanish ham yaxshi samara beradi.

“Imkon boricha sovuq havoda yuzni to‘sib turuvchi sharfdan foydalanish ham foydadan xoli emas. Shuningdek, kuniga bir mahal baliq yog‘i kapsulasidan iste’mol qilib turish ko‘zga foyda beradi”, — dedi Mehruz Saidov.