Buxoro va Andijon viloyatlarida tabiiy gaz tarmoqlariga noqonuniy ulanish holatlari fosh etildi, deb xabar bermoqda Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departamentning Buxoro viloyat boshqarmasi tomonidan “Romitantumangaz” gaz ta’minoti bo‘limi xodimlari bilan hamkorlikda tergovga qadar tezkor tadbir o‘tkazilgan. Unda “S.S.” fermer xo‘jaligi rahbari S.R. fermer xo‘jaligiga qarashli issiqxonani o‘zboshimchalik bilan gaz tarmog‘iga ulab, davlat va jamiyat manfaatlariga 198,2 million so‘m zarar yetkazgani aniqlangan.
Shuningdek, departamentning Andijon tuman bo‘limi tomonidan DXX va “Hududgaz Andijon” filiali xodimlari bilan hamkorlikda tergovga qadar tekshiruv o‘tkazilgan. Unda fuqaro Sh.I. Oltinko‘l tumani “Mirobod” MFY hududida issiqxona tashkil etib, o‘zboshimchalik bilan gaz tarmog‘iga ulanib, 103,8 million so‘mlik tabiiy gazdan noqonuniy foydalangani aniqlangan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)