Япония ва Ҳиндистон Ҳарбий-ҳаво кучлари биринчи қўшма машғулотларни бошлади, улар 26 январга қадар давом этади. Бу ҳақда Kyodo агентлиги Япония мудофаа вазирлигига таяниб хабар берди.
Қайд этилишича, манёврлар Токио яқинидаги Хякури Ҳарбий-ҳаво кучлари базасида ўтказилмоқда.
Шартли ҳаво жангларини ишлаб чиқиш учун Япония томони тўртта Ф-2 қирувчи-бомбардимончи ва тўртта F-15 қирувчи самолётини, Ҳиндистон томони эса тўртта Су-30МКИ қирувчиларини жалб қилган. Бундан ташқари, Ҳиндистон машқларга иккита C-17 ташувчи самолёти ва Ил-78 ёнилғи қуювчи самолётини юборган.
Kyodo икки мамлакат ҳарбий тадбирларни 2019 йилнинг ноябрь ойида ўтказишга келишиб олгани, аммо COVID-19 пандемияси туфайли уларни кейинга сурганини эслатди.
Ҳиндистон Япония билан икки томонлама ҳаво машқларини ўтказаётган бешинчи давлатга айланди — Токио бундай машқларни АҚШ, Австралия, Буюк Британия ва Германия билан олиб бораётганди.
Бунга қадар Япония қуруқлик ва денгиз кучлари ҳиндистонлик ҳамкасблари билан қўшма машғулотлар ўтказган.
Эслатиб ўтамиз, Ҳиндистон ва Япония АҚШ ва Австралия билан биргаликда Хавфсизлик бўйича тўрт томонлама диалогнинг (QUAD) бир қисми. Пекин минтақада ҳарбий ва иқтисодий таъсирини оширишга интилаётгани сабабли ушбу гуруҳ Хитойга қарши деб кўрилади.
Мавзуга доир: Беларусда Россия билан қўшма авиамашғулотлар бошланди
Изоҳ (0)