Кремль Британиянинг Challenger 2 танклари Украинага етказиб берилишини «жуда салбий» баҳолайди ва салбий қабул қилади, деди Россия президенти матбуот котиби Дмитрий Песков.
«Биз буни жуда салбий қабул қиламиз. Бу борада муносабатимизни яшириб ўтирмаймиз. Буюк Британия, бошқа Европа давлатлари — Польша ва ҳоказолар Украина учун янги, технологик жиҳатдан илғор ҳарбий техникаларни етказиб беришнинг янги босқичини ташкил этиш режаси ҳақида гапирмоқда, аммо бу жойдаги вазиятни ўзгартира олмайди. Улар буни тушуниши керак», — дейди Кремль матбуот котиби.
Унинг таъкидлашича, бу Россия «ҳарбий операцияси» жараёнига таъсир қилмайди.
«Бу ҳеч нарсани ўзгартира олмайди. Махсус ҳарбий операция давом этади. Худди қолганларидек бу танклар ёнмоқда ва ёнишда давом этади. Махсус ҳарбий операциянинг мақсадларига эришилади», — деди Песков.
Ўтган ҳафта Буюк Британия Киевга Challenger 2 оғир танкларининг биринчи партиясини жўнатиши ҳақида эълон қилди. Бугун, 16 январь куни Польша бош вазири Матеуш Моравецкий Германия билан Украинага Леопард танкларини етказиб бериш масаласини муҳокама қилишини айтди. Украина ташқи ишлар вазири ўринбосари Андрей Мелник Германиядан эски Торнадо самолётларини ҳам сўради.
Изоҳ (0)