Россияда сержант урушга сафарбар қилинганлар орасида обрў қозониш учун гранатани портлатиб юборди. 3 киши ҳалок бўлди, яна 16 киши жароҳат олди

Россиянинг Белгород вилояти, Тоненкое қўрғонидаги маданият уйи биносида жойлашган ҳарбий қисм ҳудудида аскар РГД-5 гранатасини портлатиб юборди, деб хабар бермоқда Meduza. Сўнгги маълумотларга кўра, оқибатида уч киши ҳалок бўлган, 16 киши жароҳатланган. Яна саккиз киши бедарак йўқолган.

Маш нашрининг ёзишича, ҳодиса 14 январь куни эрталаб, Тошкент вақти билан 6:50 да содир бўлган. Портлаш россиялик ҳарбийлар жойлашган собиқ маданият уйи биносида юз берган. Фавқулодда хизматларнинг «Интерфакс»га маълум қилишича, сержант (бошқа маълумотларга кўра, катта сержант) ётоқхонада тасодифан қўл гранатасини портлатиб юборган, оқибатда взвод ўқлари портлаб, ёнғин бошланган.

«112» Telegram канали бинода гранатанинг портлаши ортидан «қурол сақланадиган хонадаги ўқ-дорилар портлаган»и ҳақида ёзди. Унга кўра, ёнғин майдони 450 квадрат метрни ташкил этган. Портлашга сабабчи бўлган аскар омон қолган ва касалхонага ётқизилган. Дам олиш масканига туташ бинолардан 15 киши эвакуация қилинган, маҳаллий аҳолидан ҳеч ким жабрланмаган.

База нашрининг таъкидлашича, бўлинмадаги портлашни Свердловск вилоятидан келган ҳарбий хизматчи уюштирган (исми кўрсатилмаган), ярадорлар ва ҳалок бўлганларнинг барчаси урушга сафарбар қилинганлар эди.

«Дастлабки маълумотларга кўра, аскар ўз қўл остидагилар олдида обрў қозониш учун РГД-5 гранатасини қўлига олган», — деб ёзади База.

«112» хабарига кўра, ҳодиса юзасидан жиноий иш қўзғатилган, бироқ қайси модда бўйича иш очилгани номаълум. РЕН телеканали Тоненкое қўрғони қуршаб олингани, журналистлар унинг ҳудудига киритилмагани ҳақида хабар берди.