Energetika vazirligi sovuq kunlarda gaz va elektroenergiyaga bo‘lgan talabning oshishi, ularni yetkazib berishda yuzaga kelayotgan muammolar yuzasidan aholiga murojaat qildi. Tegishli murojaat “O‘zbekiston 24” efirida e’lon qilindi.
“Respublikada sovuq haroratning keskin tushib ketishi natijasida elektr energiya va tabiiy gazga bo‘lgan talab oshgan. Talabni qondirish uchun tabiiy gaz va elektr energiyasi importi hajmini tezkor chora va kelishuvlar asosida maksimum darajaga oshirish hisobiga kunlik tabiiy gaz iste’molining 10 foizi hamda elektr energiyasining 8 foizi aynan qo‘shimcha import yordamida ta’minlanayotgani aytildi.
Maksimum talabni qondirish uchun gaz quvurlari va magistral elektr tarmoqlarining o‘tkazuvchanlik qobiliyati yetarli bo‘lsa-da, resurslar yetarli emasligi hisobiga iste’molchilarni energiya resurslari bilan ta’minlashda muammolar kuzatilmoqda.
“Xususan, anomal sovuq tufayli 12-yanvarda qo‘shni mamlakatning tabiiy gaz qazib chiqarish konlarida yuzaga kelgan avariyaviy holat tabiiy gaz importining to‘liq to‘xtashiga va elektr energiyasi importining 20 foizga qisqarishiga sabab bo‘ldi. Energiya resurslari taqchilligi kuzatilayotgan paytda ushbu resurslarni birinchi navbatda aholi va ijtimoiy soha obyektlariga yetkazib berish uchun elektr energiyasi eksporti to‘xtatildi.
Bundan tashqari, yirik sanoat korxonalariga energiya resurslarini yetkazib berish hajmi o‘rtacha 70–80 foizga qisqartirildi. Shunga qaramay, respublikaning elektr energiyasi iste’moli eng baland ko‘rsatkichga, ya’ni 250 mln kVt/soatga chiqdi. Tabiiy gazga bo‘lgan kunlik talab qazib chiqarishga nisbatan yuqoriligicha saqlanib qolmoqda”, — deyiladi murojaatda.
Ta’kidlanishicha, 2022-yil 31-dekabr kuni cheklov kiritilmagan va kunlik elektr energiyasi iste’moli 220 mln kVt/soatni tashkil etgan. Toshkent shahrida 13-yanvar kuni elektr energiyasi iste’moli 32 mln kVt/soatdan ortib, turli sabablarga (avariyaviy holatlar va cheklovlar) ko‘ra 1 mln kVt/soat elektr energiyasi iste’molchilarga yetkazib berilmagan.
“Tabiiy gazni aholiga yo‘naltirish uchun issiqlik elektr stansiyalarida tabiiy gaz yoqish hajmi kamaytirilib, zaxiradagi mazut yoqilg‘isi rejaga nisbatan 3 barobarga ko‘p yoqilmoqda. O‘tgan kuz-qish mavsumiga nisbatan joriy kuz-qish mavsumida Chorvoq suv omborida suv sathining yuqoriligi sababli gidroelektr stansiyalar tomonidan rejaga nisbatan 170 foiz elektr energiyasi ishlab chiqarilmoqda. Gaz tanqisligi kuzatilayotgan shu kunlarda iste’molchilar xonadonlarni isitish uchun elektr qurilmalaridan keng foydalanmoqda. Natijada, birgina Toshkent shahrida kun davomida tarmoqlarda yuklamalarning ortishi hisobiga mingdan ortiq nosozliklar yuzaga keldi”, — deyilgan murojaatda.
Nosozliklarning oldini olish maqsadida respublika bo‘ylab barcha hududiy elektr tarmoqlari korxonalaridan qo‘shimcha brigadalar Toshkentga jalb qilingan.
Energetika vazirligi vaziyatni o‘nglash, nosozliklarni bartaraf etish uchun barcha zaruriy choralarni ko‘rayotganini qayd etdi. Vazirlik resurslaridan oqilona va tejamkorlik bilan foydalanish uchun quyidagilarni maslahat beradi:
— xonadonlarda bittadan ortiq elektrda ishlaydigan isitish qurilmalaridan foydalanmaslik;
— korxonalar va tashkilotlar xodimlarini vaqtincha onlayn ish rejimiga o‘tkazish;
— ortiqcha ko‘cha chiroqlarini, reklama ekranlari va illyuminatsiyalar, shu jumladan, qurilishi tugallanmagan binolardagi chiroqlarni o‘chirish;
— energiya resurslaridan noqonuniy foydalanayotgan iste’molchilarga chora ko‘rish lozim.
Energiyani shu tariqa tejash orqali aholi va ijtimoiy soha obyektlariga yo‘naltirilishi aytilgan. Energiya resurslaridan noqonuniy foydalanish holatlari kuzatilganda, 1154, 1104, 105 telefon raqamlariga murojaat qilish so‘raladi.
“Misol uchun, o‘tkazilgan o‘rganishlar natijasida iste’molchilar tomonidan joriy kuz-qish davrida tabiiy gazdan 334 mlrd so‘mlik 3 mingta, elektr energiyasidan 135 mlrd so‘mlik 2 ming 300 ta holatda noqonuniy foydalanish holatlari aniqlangan”, — deyilgan murojaat so‘ngida.
Izoh (0)