Qashqadaryo viloyatining Kasbi tumanida xorijiy kompaniya 560 tup daraxtni ko‘chirib, 2,8 milliard so‘m zarar yetkazdi. Bu haqda viloyat Ekologiya va atrof-muhitni muhofaza qilish boshqarmasi xabar berdi.
Ma’lum qilinishicha, boshqarmaga 9-yanvar kuni shu tumanda yashovchi fuqaro murojaat qilib, Indorama Agro MCHJ XK tomonidan Kasbi tumani “Nazartepa” MFYdagi Navro‘z hududida har xil turdagi va diametrdagi daraxtlar texnika yordamida ildizlari bilan ko‘chirib o‘tkazilganini ma’lum qilgan.
Murojaat inspektorlar tomonidan borib o‘rganilgan. O‘rganish davomida Indorama Agro MCHJ XK tomonidan jami 560 tup har xil turdagi va diametrdagi daraxtlarni tartib-qoidalarga amal qilmasdan ko‘chirgani oqibatida daraxtlarga zarar yetkazilgani aniqlangan.
Noqonuniy, ruxsatsiz hamda daraxtlarni ko‘chirish tartib-qoidalariga amal qilinmasdan ko‘chirilganligi natijasida yetkazilgan zarar hisoblanganda tabiatga, o‘simlik dunyosiga 2 milliard 824 million 495 ming so‘mni tashkil etgan.
Tabiatga yetkazilgan zararni undirish uchun holat yuzasidan rasmiylashtirilgan hujjatlar huquqni muhofaza qilish organlariga yuborilgan.
Izoh (0)