Qozog‘istonda noqulay ob-havo tufayli yo‘lda qolib ketgan ikki avtobusdan 70 ga yaqin o‘zbekistonlik evakuatsiya qilingandi. O‘zbekiston Transport vazirligi ularning ahvoli haqida ma’lumot berdi.
Vazirlik axborotiga ko‘ra, 9-yanvar kuni soat 18:00 da Uzautotrans service MChJning Yutong Bus ZK6122h9 rusumli avtobusi barcha talablarga rioya etgan holda transport vositasi texnik, haydovchilar esa tibbiy ko‘rik va maxsus yo‘riqnomalardan o‘tib, Toshkent—Moskva yo‘nalishi bo‘yicha 26 nafar yo‘lovchi bilan “Toshkent” avtovokzalidan belgilangan jadval asosida qatnovni amalga oshirish uchun yo‘lga chiqqan.
Yo‘nalish davomida 10-yanvar kuni Toshkent vaqti bilan soat taxminan 22:00 da Qozog‘istonning Aqto‘be viloyati Samara—Chimkent trassasida Favqulodda vaziyatlar vazirligi tomonidan noqulay ob-havo sharoiti tufayli yo‘llarda vujudga kelgan muzlamalar sabab shu yo‘nalishda harakatlanayotgan barcha yengil, yuk va jamoat transport vositalari harakati vaqtincha to‘xtatilgan.
Shu jumladan, o‘zbekistonliklar bo‘lgan avtobus harakati ham vaqtinchalik to‘xtatilgan. Mahalliy hukumatning FVV departamenti tomonidan yo‘lovchilar o‘sha atrofdagi masjidga vaqtinchalik joylashtirilgan.
Yo‘ldagi muzlar va to‘siqlar bartaraf etilgandan so‘ng transport vositalari o‘z harakatlarini davom ettirgan.
“Hozirda Uzautotrans service MChJning Toshkent—Moskva yo‘nalishida qatnovni amalga oshirayotgan avtobus Qozog‘iston va Rossiya chegara bojxona postidan o‘tmoqda. Haydovchi bilan o‘rnatilgan operativ aloqaga ko‘ra, avtobusdagi barcha yo‘lovchilar sog‘-salomat holda yo‘nalishda o‘z safarini davom ettirmoqda”, — deyiladi xabarda.
Izoh (0)