«Дарё» нашри 12 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Совуқ об ҳаво Россия-Украина ҳужумларини тўхтатмоқдами?
Сўнгги кунларда Украинанинг шарқий қисмида ҳукм сураётган совуқ об-ҳаво оғир ҳарбий техникадан фойдаланишни кўпайтиришга сабаб бўлмоқда, чунки ерлар қаттиқ музлаган. Бироқ Bloomberg агентлигининг ёзишича, узоқ совуқ пайтида на Россия, на Украина томонидан ҳужумлар содир бўлиши мумкин —совуқ туфайли дронлар ва радиостанцияларнинг батареяларини икки баравар тез ўқлашга тўғри келади, кўриш даражасининг ёмонлашуви эса дронларни артиллерияни разведка қилиш ва бошқариш учун яроқсиз ҳолга келтирмоқда.
Ернинг музлаши ғилдиракли ва изли транспорт воситаларидан фойдаланишнинг кўпайишига имкон берган бўлса-да, бундай ҳаво янги ҳужумни ташкил қилишдан олдин қўмондонлар эътиборга олиши керак бўлган кўплаб омиллардан биридир, деб ёзади Bloomberg Лондондаги Қироллик Бирлашган Хизматлар Институти таҳлил маркази ходими Эд Арнольдга таяниб.
2023 йил бошидан буён Ғарб давлатлари Украинага ҳарбий ёрдамни кучайтирди. Янги турдаги қуролларни етказиб беришдан ташқари, ғарб инструкторлари томонидан ўқитилаётган украиналик ҳарбийлар сони ҳам ортмоқда. Бундан ташқари, Польша халқаро коалиция таркибида Киевга 14 та Леопард 2 танкини етказиб беришини маълум қилди.
Украинага ғарб танкларини юбориш масаласида Берлин халқаро босим остида қолдими?
Германия канцлери Олаф Шольц Украинага танклар етказиб бериш масаласида АҚШ президенти Жо Байденнинг позициясидан келиб чиқади. Бу ҳақда Politico нашри Германиядаги манбаларига таяниб ёзмоқда.
Аввалроқ икки мамлакат етакчилари жанговар пиёда машиналарини юбориш бўйича ўз қадамларини мувофиқлаштириб олган эди. Шольц шу ҳафта Берлиндаги ҳудудий сайловолди митингда Леопард танкларини етказиб бериш «дўстлар ва иттифоқдошлар, айниқса, бизнинг трансатлантик шеригимиз, АҚШ билан» муҳокама қилиниши керак, деган эди.
Politico қайд этишича, канцлерга Лондоннинг Киевга Challengeр 2 танкларини юбориш қарори босим ўтказмоқда — Буюк Британия Украинага Ғарбда ишлаб чиқарилган танкларни берадиган биринчи мамлакатга айланиши мумкин. Бундан ташқари, Польша Украинага Германияда ишлаб чиқарилган танкларни етказиб беришини эълон қилиб бўлди.
Аввалроқ Пентагон Украинага Америкада ишлаб чиқарилган Абрамс танкларини юбормаслигини айтиб, буни улар кўп ёнилғи сарфлаши ва улардан фойдаланиш қийинлиги билан изоҳлаганди.Бу танклар кўплаб мамлакатларда, хусусан, Испания, Польша, Греция, Дания ва Финляндияда ҳам бор. Аммо уларни Мюнхендаги Krauss-Maffei Wegmann компанияси ишлаб чиқаради, шу сабабли уларни Украинага етказиб беришда ишлаб чиқарувчи мамлакатнинг реекспорт учун рухсати керак, шу муносабат билан ҳозир «халқаро босим Берлинга қаратилган», деб ёзганди аввалроқ Politico.
Жанубий Корея ўз ҳудудида хорижий ядро қуролини жойлаштириши ёки ўз ядросини ишлаб чиқиши мумкин
Жанубий Корея, агар КХДР билан муносабатлардаги вазият ёмонлашса, ўз ҳудудида хорижий ядро қуролини жойлаштириши ёки ўз ядросини ишлаб чиқиши мумкин. Бу ҳақда мамлакат президенти Юн Сок Ёл маълум қилди, деб хабар бермоқда Жанубий Кореянинг «Newsис» ахборот агентлиги.
Бу ҳақда Юн Сок Ёл Жанубий Корея мудофаа ва ташқи ишлар вазирлари билан учрашувда гапирди. Вазирларнинг ҳисоботини тинглаб, президент Сеулга ҳужум қилинган тақдирда «100 ва ҳатто 1000 баравар катта кўламда» жавоб қайтариш учун шундай ҳарбий куч яратишни буюрди.
Январь ойи бошида Юн Сук Ёл Сеул ва Вашингтон Америка ядровий қуроллари иштирокида қўшма машғулотлар ташкил этиш имкониятини муҳокама қилаётганини айтган. «Ядро қуроллари АҚШга тегишли бўлса-да, разведка маълумотларини алмашиш, режалаштириш ва машқлар биргаликда амалга оширилиши керак», — деган президент.
Юн Сок Ёлнинг сўзларига кўра, Вашингтон бу ташаббусга ижобий қарамоқда. Машғулотлар эса Жанубий Кореяга КХДРдан келаётган ядро таҳдидига тайёргарлик кўришда ёрдам бериши керак. Ушбу вазиятда КХДР раҳбари Ким Чен Ин Сеул ва Вашингтон ўртасида қўшма машғулотлар ўтказиш режасини «катта хато» деб атамоқда.
Ўзбекистондаги барча газ заправкалар фаолияти вақтинча тўхтатилди, аномал совуқ об ҳавода табиий газ аҳоли хонадонлари ва ижтимоий соҳа объектларига етказилади.
Энергетика вазирлиги Ўзбекистондаги газ заправкалар фаолияти вақтинча тўхтатилганини эълон қилди.Вазирлик матбуот хизматининг билдиришича, Республика бўйича аномал совуқ ҳарорат давом этаётганлиги сабабли қувурларда газ босимининг кескин пасайиши кузатилмоқда.
Шу муносабат билан табиий газни биринчи навбатда аҳоли хонадонлари, электр энергияси ишлаб чиқарувчи корхоналар ҳамда ижтимоий соҳа объектларига етказиб бериш чоралари кўрилади. Шу мақсадда айрим йирик ишлаб чиқарувчи саноат корхоналарига табиий газ етказиб бериш ҳажми кескин камайтирилди ҳамда автомобилларга газ тўлдириш компрессор шохобчалари фаолияти қисқа муддатга вақтинча тўхтатилди.
Шунингдек, ортадиган талабни тўлиқ қондириш мақсадида автобензин ва дизель ёқилғиси маҳсулотлари қўшимча миқдорларда сотувга чиқарилади.
Изоҳ (0)