Shovot tumani hokimi Odilbek Artiqov maktabda tizimdan uzilgan isitish panellarini ushlab ko‘rgani aks etgan surat keng muhokamalarga sabab bo‘ldi. Hokimlik holat yuzasidan munosabat bildirdi.
Qayd etilishicha, 10-yanvar kuni tunda tuman hokimi tomonidan ijtimoiy soha obyektlarida anomal sovuq sharoitida isitish tizimining ahvoli bo‘yicha o‘rganish ishlari olib borilgan.
Tumanning chekka hududida joylashgan 10-son umumiy o‘rta ta’lim maktabining isitish tizimida muammo mavjud bo‘lib, joriy yilning 8-yanvar kuni tegishli tashkilotlar tomonidan isitish qozoni qayta ta’mirlash uchun olib ketilgan.
Sovuq havo natijasida maktabning isitish tizimi ishdan chiqmasligi uchun issiqlik uzatish panellarini suvdan tozalash ishlari amalga oshirilgan. Tuman hokimi ushbu jarayonni, ya’ni issiqlik uzatish panellari nosoz holatga kelib qolmaganini shaxsan o‘zi ko‘zdan kechirgan. Bu esa ijtimoiy tarmoqdagi ko‘plab turli kanallarda keng yoritilib, kuzatuvchilar muhokamasiga sabab bo‘lgan.
“Hozirda isitish qozonlarini o‘rnatish ishlari olib borilmoqda. Ijtimoiy tarmoq foydalanuvchilaridan tuman hokimining maktab o‘quvchilarining sifatli ta’lim olishlari uchun zarur sharoit yaratish bo‘yicha harakatlarini noto‘g‘ri tushunib, o‘zgacha talqin qilmasliklarini so‘raymiz”, — deyiladi xabarda.
Izoh (1)
Об хаво нормал холатда булгани учун мактаблар очилгани аномал совукда нозарат ишлари олиб борилгани уялмай айтишади. Об хова яхшигина бахона буларга