Tailand ikki kun avval e’lon qilingan sayyohlar uchun koronavirus cheklovlarini bekor qildi, deb xabar beradi Reuters mamlakat sog‘liqni saqlash vaziri Anutin Charnvirakulga tayanib.
“Emlanganlik haqidagi dalillarni taqdim etish malollik va noqulaylik keltirgan bo‘lardi, shuning uchun bunga zarurat yo‘q, degan qarorga keldik”, — dedi vazir jurnalistlarga. Shuningdek, uning qo‘shimcha qilishicha, dunyoda erishilgan immunizatsiya darajasi emlanmagan sayyohlar uchun kirishni cheklamaslik imkonini beradi.
Rossiya sayyohlik operatorlari uyushmasi ham bu ma’lumotni tasdiqladi. 9-yanvar kuni uchib kelgan sayyohlardan vaksinatsiya bilan bog‘liq hujjatlar so‘ralmagan. Kirish qoidalarida cheklovlar ko‘zda tutilmaydigan rasmiy hujjat yaqin orada e’lon qilinishi kutilmoqda.
7-yanvar, shanba kuni Tailand hukumati koronavirus cheklovlari qaytarilishini e’lon qildi. Ular 9-yanvardan amal qilishni boshlashi kerak edi. Ularga ko‘ra, sayyohlar mamlakatga kirish uchun emlangani haqidagi sertifikatni yoki koronavirusga chalinib sog‘aygani haqidagi ma’lumotnomani taqdim etishi kerak edi. Bu hujjatlardan hech birini taqdim eta olmaydiganlarga PZR-testdan o‘tish taklif qilinardi.
Tailand 2022-yil oktabrida bekor qilingan koronavirus cheklovlarini qayta tiklashga qaror qilishi Xitoyda kasallanish darajasi keskin o‘sgani bilan bog‘liqligi aytilgandi. Xitoy fuqarolari esa Tailandga sayyohlar oqimining katta qismini tashkil qiladi.
Izoh (0)