Таиланд икки кун аввал эълон қилинган сайёҳлар учун коронавирус чекловларини бекор қилди, деб хабар беради Reuters мамлакат соғлиқни сақлаш вазири Анутин Чарнвиракулга таяниб.
«Эмланганлик ҳақидаги далилларни тақдим этиш малоллик ва ноқулайлик келтирган бўларди, шунинг учун бунга зарурат йўқ, деган қарорга келдик», — деди вазир журналистларга. Шунингдек, унинг қўшимча қилишича, дунёда эришилган иммунизация даражаси эмланмаган сайёҳлар учун киришни чекламаслик имконини беради.
Россия сайёҳлик операторлари уюшмаси ҳам бу маълумотни тасдиқлади. 9 январь куни учиб келган сайёҳлардан вакцинация билан боғлиқ ҳужжатлар сўралмаган. Кириш қоидаларида чекловлар кўзда тутилмайдиган расмий ҳужжат яқин орада эълон қилиниши кутилмоқда.
7 январь, шанба куни Таиланд ҳукумати коронавирус чекловлари қайтарилишини эълон қилди. Улар 9 январдан амал қилишни бошлаши керак эди. Уларга кўра, сайёҳлар мамлакатга кириш учун эмлангани ҳақидаги сертификатни ёки коронавирусга чалиниб соғайгани ҳақидаги маълумотномани тақдим этиши керак эди. Бу ҳужжатлардан ҳеч бирини тақдим эта олмайдиганларга ПЗР-тестдан ўтиш таклиф қилинарди.
Таиланд 2022 йил октябрида бекор қилинган коронавирус чекловларини қайта тиклашга қарор қилиши Хитойда касалланиш даражаси кескин ўсгани билан боғлиқлиги айтилганди. Хитой фуқаролари эса Таиландга сайёҳлар оқимининг катта қисмини ташкил қилади.
Изоҳ (0)