Nigeriyada AK-47 avtomatlari bilan qurollangan shaxslar janubiy Edo shtatidagi temiryo‘l vokzalidan 30 dan ortiq odamni o‘g‘irlab ketdi. Bu haqda shtat gubernatori ma’muriyatiga tayanib, Reuters agentligi xabar berdi.
Hujum fevral oyida bo‘lib o‘tadigan prezidentlik saylovlari oldidan aholisi eng ko‘p Afrika davlatida beqarorlik kuchayib borayotganiga misol, deb ta’kidladi agentlik.
Politsiyaning ma’lum qilishicha, Tom Ikimi stansiyasiga hujum yo‘lovchilar qo‘shni Delta shtatidagi Warri shahriga ketish uchun poyezd kutayotgan paytda sodir bo‘lgan. Hodisa oqibatida bir necha kishi jarohatlangan.
Qurolli shaxslar 32 kishini olib ketgan, ulardan biri qochishga muvaffaq bo‘lgan. Politsiya qidiruv-qutqaruv operatsiyasini olib bormoqda.
Avvalroq Nigeriyadagi maktabda sodir bo‘lgan yong‘inda 25 bola halok bo‘lgani, shuningdek, qurolli shaxslarning masjidga hujumi oqibatida 18 kishi qurbon bo‘lgani to‘g‘risida xabar berilgandi.
Izoh (0)