NASA koinotda ishdan chiqqan ERBS nomli sun’iy yo‘ldosh Yerga qulashi mumkinligidan ogohlantirdi.
1984-yilda koinotga uchirilgan ERBS sun’iy yo‘ldoshi NASA olimlarining prognozlari bo‘yicha 9-yanvar, dushanbaga o‘tar kechasi Toshkent vaqti bilan taxminan 4:40 da Yerga qulashi kerak edi. Biroq, bu faqat taxminiy vaqt bo‘lgan, chunki ushbu kosmik apparat hali Yer atmosferasiga kirmagan.
NASA hisoblashicha, og‘irligi salkam 2,5 tonna bo‘lgan sun’iy yo‘ldosh atmosferada yonib ketishi kerak, biroq uning tarkibiy qismlari Yer atmosferasiga kirgandan keyin ham saqlanib qoladi va sayyora yuzasiga tushadi. Ammo olimlar bu elementlarning kimgadir zarar yetkazish xavfi juda kichik, taxminan 9 400 dan 1 holat ekanini ta’kidlamoqda.
ERBS kosmik apparati 2005-yilda ilmiy faoliyatini to‘xtatgan bo‘lsa-da, koinotda 38 yil bo‘ldi. Sun’iy yo‘ldosh o‘z asboblari yordamida quyosh energiyasining Yer tomonidan yutilishi va aks qaytarilishi jarayonini o‘rgandi. Oxirgi 17 yil davomida ERBS kosmik qoldiq sifatida Yer atrofida aylanib yurdi — sayyoraning tortishish kuchi uni asta-sekin Yer tomon tortgan.
Izoh (0)