Quruq yuk tashiydigan Glory kemasi Misr shimolidagi Al-Qantara shahri yaqinida Suvaysh kanalida sayozlikka o‘tirib qoldi. Shatakchi kemalar kemani sayozlikdan chiqarishga harakat qilmoqda. Bu haqda Misrning Leth Agencies kemachilik agentligi xabar berdi.
“Glory yuk kemasi janubga qarab yo‘l olgan kemalar karvoniga qo‘shilayotib, Al-Qantara yaqinida sayozlikka o‘tirib qoldi”, — deyiladi Leth Agencies xabarida.
AP xabariga ko‘ra, kema Ukrainadan Xitoyga qariyb 65 ming tonna makkajo‘xori olib ketayotgan edi. VesselFinder servisiga qaraganda, kema Marshall orollari bayrog‘i ostida harakatlangan.
Keyinroq general-leytenant Usamu Rabiye kemaning to‘xtab qolishiga uning sayozlikka o‘tirishi emas, balki undagi nosozliklar sabab bo‘lganini ma’lum qildi. Uning gaplarini Misrning ShoroukNews portali keltirib o‘tdi.
Glory kemasi don bitimi doirasida Ukrainadan oziq-ovqat mahsulotlarini olib ketishda ishtirok etmoqda. Marine Traffic servisi ma’lumotlariga ko‘ra, 24-dekabr kuni kema Ukrainaning Chernomorsk portidan chiqqan. Uning uzunligi 225 metrga teng.
Eslatib o‘tamiz, 2021-yil 23-mart kuni dunyodagi eng yirik konteyner tashuvchi kemalardan biri Ever Given Suvaysh kanalida sayozlikka o‘tirib qolgandi. Natijada kanal bo‘ylab harakat butunlay to‘silib qolgandi, bu esa ko‘p millionlik zarar keltirdi. Yuk tashuvchilar Yaxshi umid burnini aylanib o‘tuvchi boshqa, uzunroq yo‘ldan yurishiga to‘g‘ri kelgandi.
Izoh (0)