Braziliyada norozilik namoyishlari tugadi, deb xabar qildi poytaxt Federal okrugi matbuot kotibi, Adliya va jamoat xavfsizligi vazirligi ijrochi kotibi Rikardo Kappelli. Bu haqda u o‘zining Twitter sahifasida yozgan.
“Federal okrugdagi vaziyat nazorat ostida. Bir necha soatdan keyin odatiy ishimizni davom ettiramiz. Bo‘lib o‘tgan voqealar obdon tekshiriladi. Jinoyatchilarni aniqlash va jazolash davom etadi”, — deydi Kappelli.
Braziliya sobiq prezidenti, o‘ngchi Jair Bolsonaruning tarafdorlari 8-yanvar kuni yangi prezident Luis Inasiu Lula da Silvaga qarshi namoyish uyushtirib, Braziliya Milliy Kongressi, prezident saroyi va mamlakat Oliy sudiga bostirib kirgandi. Bolsonaru 2022-yilning kuzida o‘tkazilgan saylovlarda 49,2 foiz ovoz bilan mag‘lubiyatga uchragan — da Silva 50,8 foiz ovoz olgan (Bolsonaru saylovlar soxtalashtirilgani da’vo qildi, ammo yakunda natijalarni tan oldi). Namoyishchilar ovoz berish natijalarini qayta ko‘rib chiqishni talab qildi. Ular hukumat binolarida vayronagarchiliklar uyushtirdi. Federal okrug gubernatori Ibaneysa Roshining aytishicha, tartibsizliklar ortidan 400 dan ortiq odam hibsga olingan.
O‘z navbatida, Bolsonaru sodir bo‘layotgan voqealarni qoralab, “o‘g‘irlik va jamoat binolariga kirish belgilangan tartibni buzadi”, dedi. Sobiq prezident dekabr oyi oxirida, muddati tugashiga ikki kun qolganda mamlakatni tark etgandi. Hozir u Amerikaning Florida shtatida, Orlandoda, deb yozadi The New York Times.
Tartibsizliklar boshlangan paytda da Silva poytaxtda bo‘lmagan, u suv toshqini oqibatlarini tekshirish uchun San-Paulu shtatiga ketgan edi. Prezident Braziliyada yanvar oyi oxirigacha favqulodda holat e’lon qildi.
Ikki yil oldin, 2021-yil yanvar oyida AQSHda shunga o‘xshash tartibsizliklar bo‘lib o‘tgandi — o‘sha paytda sobiq prezident Donald Tramp tarafdorlari Kapitoliyni egallab olgan. Ular ham namoyishlardan bir necha oy oldin o‘tkazilgan saylov natijalarini qayta ko‘rib chiqishni talab qilishdi. Tartibsizliklarda bir necha kishi halok bo‘lgan, yuzlab odamlar yaralangandi.
Izoh (0)