Germaniya Ukrainaga va’da qilgan 40 ta Marder piyodalar jangovar mashinasini “sarosima bilan” qidirmoqda, deb xabar berdi Der Spiegel. Jurnal ma’lumotlariga ko‘ra, Rheinmetall mudofaa konserni omborlarida 60 ta foydalanishdan chiqarilgan shunday mashinalar bor, ammo ularni modernizatsiya qilish juda ko‘p vaqt oladi. Shu sababli, rasmiylar Kiyevga Marder’larni Germaniya armiyasi zaxiralaridan olib bermoqchi.
Der Spiegel nashrining yozishicha, kansler Olaf Shols yangi yordam paketini e’lon qilganidan so‘ng, harbiylar, siyosatchilar va xavfsizlik bo‘yicha ekspertlar 40 ta Marder’ni qayerdan olish haqida o‘ylab ajablangan. Hukumat matbuot kotibi Shteffen Hebeshtrayt jurnalistlarga 6-yanvar kuni bu savolga javob berishni va’da qilgan, ammo bu amalga oshmagan.
Xristian-demokratik ittifoqdan Bundestag deputati Xenning Otte kanslerni Ukrainaga Marder’larni topshirish qarori uchun tanqid qildi. Uning fikricha, hukumat bunday ta’minotga tayyor emasligi sababli, Bundesver shundoq ham “ahvoli yomon omborlarini bo‘shatishga majbur” bo‘lmoqda.
Olaf Shols yanvar oyi boshida AQSH prezidenti Jo Bayden bilan muzokaralar chog‘ida Ukrainaga Marder jangovar mashinalarini berish rejalari haqida ma’lum qilgandi. Shu bilan birga Vashington Kiyevga 50 ta Bredli piyodalar jangovar mashinasini jo‘natmoqchi.
Izoh (0)