AQSH Moliya vazirligi qora ro‘yxatni e’lon qildi, unga olti nafar Eron fuqarolari — Qods Aviation Industries rahbarlari kirdi. Amerika sanksiyalariga uchragan ushbu kompaniya mudofaa mahsulotlarini, shu jumladan, uchuvchisiz uchar qurilmalarni ishlab chiqaradi.
Amerika Moliya vazirligi press-relizida aytilishicha, kompaniya Rossiyaga Ukraina hududida foydalanish uchun jangovar dronlarni yuborishda ishtirok etgan.
Qora ro‘yxatdan Eronning Aerokosmik sanoat tashkiloti direktori ham o‘rin oldi, u “Eronning ballistik raketalar ishlab chiqarish dasturi ustidan nazorat uchun javobgar”.
G‘arb mamlakatlari Eronni Ukrainadagi harbiy nizoda qo‘llash uchun Rossiyaga uchuvchisiz uchar qurilmalar yetkazib berishda ayblamoqda. Eron va Rossiya buni rad etmoqda. Eron hukumati dronlar yetkazib berilganini tan olgandi, ammo, ularning so‘zlariga ko‘ra, qurol-yarog‘ harbiy harakatlar boshlanishidan oldin yuborilgan.
24-dekabr kuni Ukraina prezidenti ofisi rahbarining maslahatchisi Mixail Podolyak Eron Rossiyaga dronlar yetkazib berish hajmini oshirmoqchi ekanini ma’lum qildi. U Eronning dronlar ishlab chiqaruvchi zavodlarini yo‘q qilib, uchar qurilmalar yetkazib beruvchilarni hibsga olishga chaqirdi.
Avvalroq Eron Tashqi ishlar vazirligi Ukraina prezidenti Vladimir Zelenskiyning AQSH Kongressidagi nutqini tanqid qilgan edi. Tanqidga Zelenskiy Ukrainaga qarshi urushda foydalanish uchun Eron Rossiyaga dronlar yetkazib berayotgani haqida gapirgani sabab bo‘lgan. Shuningdek, Eron Ukrainani “tahdidli bayonotlar” oqibatlari haqida ogohlantirdi.
Izoh (0)