Dunyoda neft narxi tushib bormoqda

4-yanvarda global yoqilg‘iga talab bilan bog‘liq xavotirlar fonida neft narxining pasayishi tezlashdi. Bu haqda “Interfaks” xabar bermoqda.

Londonning ICE Futures birjasida Brent markasining mart fyucherslari Toshkent vaqti bilan 15:42 ga kelib 1,91 dollarga (2,33 foizga) pasayib, bir barrel uchun 80,19 dollarni tashkil qildi. 19:13 da esa bir barrel uchun 78,61 dollargacha (4,25 foizga) arzonlashdi.

Nyu-York tovar birjasidagi elektron savdolarda WTI neftining fevral fyucherslarining kotirovkalari belgilangan vaqtga kelib 1,76 dollarga (2,29 foiz) pasayib, bir barrel uchun 75,17 dollarni tashkil qildi.

Bir kun oldin, 3-yanvarda esa Brent narxi 4,4 foizga, WTI 4,2 foizga tushgandi.

Investorlar AQSHdagi retsessiya prognozlari va karantin cheklovlarining asosiy qismi olib tashlanganidan keyin ham kasallanish darajasi yuqoriligicha qolayotgan Xitoyda koronavirus bilan bog‘liq vaziyatdan xavotirda.

“Dunyodagi eng yirik importyorda iqtisodiy faollik va neftga bo‘lgan talab pasayishda davom etishi mumkin, chunki mamlakat COVID-19 bilan yashashni o‘rganmoqda”, — deydi PVM Oil Associates tahlilchisi Stiven Brennok.

Unga ko‘ra, iqtisodiy qiyinchiliklarni faqat Xitoy boshdan kechirayotgani yo‘q.

Ta’kidlanishicha, AQSH va Yevropada qaror topgan iliq ob-havo qishda jahon bozorida yoqilg‘i taqchilligi haqidagi qo‘rquvni susaytiradi.