Лондондаги ICE биржаси маълумотларига кўра, 5 январдаги савдолар бошида Европада газ нархи 2021 йил сентябридан бери илк бор 1 000 куб метр учун 700 доллардан пастга тушди. Бу ҳақда «ТАСС» хабар бермоқда.
Маълумотларга кўра, кун бошидан буён нархларнинг умумий пасайиши 2,8 фоиздан ортган.
Голландиядаги ТТФ марказида февраль фьючерслари нархи 1 000 куб метр учун 696,3 долларга ёки МВт/соат учун 63,5 еврога тушди.
Европада иссиқ об-ҳаво шароитида газ нархлари пасаймоқда. Европа Иттифоқининг аксарият мамлакатларида ҳаво ҳарорати иқлим кўрсаткичларидан юқори бўлиб қолмоқда, бу нафақат омборлардан газ олишнинг пасайишига, балки уларни тўлдириш рекорд даражага кўтарилишига олиб келди.
Бундан ташқари, Европа Иттифоқининг шамол энергиясини ишлаб чиқаришдаги улуши 20 фоиз ёки ундан юқори кўрсаткич атрофида барқарор бўлиб қолмоқда. 1 январь куни эса у 34,7 фоизлик кўрсаткичга эришди.
20 декабрь куни энергия ресурсининг биржа нархи Уренгой—Помари—Ужгород магистрал газ қувуридаги портлаш фонида 1 МВт/соат учун 114,33 еврогача кўтарилди. Кейинчалик газ нархи ёз бошидаги даражага туша бошлади.
22 декабрь куни Европа Иттифоқи газ нархининг юқори чегарасини МВт/соат учун 180 евро миқдорида тасдиқлади.
Чеклов 2023 йил 15 февралда кучга киради, Европа Комиссияси чегара ҳақидаги келишувни «энергия таъминоти хавфсизлиги ва молиявий бозорлар барқарорлигини» таъминлаш билан изоҳлади.
Изоҳ (0)