2023-yilda Buyuk Britaniya G7 mamlakatlari orasida eng yomon retsessiyaga duch keladi va iqtisodiy tiklanish eng zaif bo‘ladi. Bu haqda iqtisodchilarga tayanib Financial Times xabar bermoqda.
Nashr tomonidan so‘rovnomada 101 nafar ekspert ishtirok etdi. Ko‘pchilikning fikricha, koronavirus pandemiyasi va Ukrainadagi urush natijasida yuzaga kelgan inflyatsiya zarbasi Buyuk Britaniyada boshqa mamlakatlarga qaraganda uzoqroq seziladi.
Shu sababli Angliya banki foiz stavkalarini yuqori darajada ushlab turishga, hukumat esa qattiq fiskal siyosat olib borishga majbur bo‘ladi.
Buyuk Britaniya yalpi ichki mahsuloti pasaya boshladi. Ba’zi ekspertlarning fikricha, bu ko‘rsatkich yanada tushadi. Bu esa oziq-ovqat va energiya narxining oshishiga duch kelgan uy xo‘jaliklarining daromad darajasiga ta’sir qiladi.
“2023-yilgi retsessiya pandemiyaning iqtisodiy ta’siridan ko‘ra yomonroq bo‘ladi”, — dedi mehnat bozori mutaxassisi Jon Filpot.
Respondentlarning ko‘pchiligiga ko‘ra, yil oxiriga kelib inflyatsiya pasayadi, iqtisodiyot esa o‘sishga qaytadi.
Capital Economics konsalting kompaniyasi mutaxassisi Pol Deyls 2024-yil 2023-yilga qaraganda ancha yaxshi bo‘ladi deb hisoblaydi.
Consensus Economics kompaniyasining prognoziga ko‘ra, kelgusi yilda Buyuk Britaniya yalpi ichki mahsuloti 1 foizga, Yevrozonada 0,1 foizga qisqaradi, AQSHda esa 0,25 foizga oshadi.
Milliy statistika boshqarmasi ma’lumotlariga ko‘ra, o‘tgan yilning uchinchi choragida Buyuk Britaniya iqtisodiyoti oldingi uch oyga nisbatan 0,3 foizga qisqardi, bu boshqa G7 mamlakatlari orasida eng yomon ko‘rsatkichdir.
Oktabr oyida 41 yil davomida rekord darajadagi 11,1 foizga yetgan inflyatsiya noyabr oyida mamlakatda 10,7 foizga tushdi. O‘sha oyda Angliya Banki asosiy foiz stavkasini 33 yil ichida eng baland darajaga oshirdi — 75 bazaviy punktga, yillik 2,25 foizdan 3 foizgacha.
Izoh (0)