O‘zbekistondagi davlat banklaridan biri — “O‘zagroeksportbank” ustav kapitalidagi 100 foiz davlat ulushi sotildi. Bu haqda Davlat aktivlarini boshqarish agentligi xabar bermoqda.
Ta’kidlanishicha, bankni O‘zbekiston prezidentining farmoni bilan xususiy sektorga sotish ko‘zda tutilgan edi.
Ma’lum bo‘lishicha, “O‘zagroeksportbank”ning 100 foizlik aksiyalari 5 mln dollarga Support Level xorijiy korxonasiga sotilgan.
Kompaniya tomonidan bankning ustav kapitalini 29 mlrd so‘mdan kam bo‘lmagan qiymatga oshirish hamda bankning infratuzilma, texnologiya va mahsulotlarini rivojlantirishga kamida 50 mln dollar investitsiya kiritish sharti bilan sotib olish taklif qilingan.
“O‘zagroeksportbank” muammoli kreditlar ulushi bo‘yicha O‘zbekistonda yetakchilik qiladi.
Qayd etilishicha, “O‘zagroeksportbank” O‘zbekiston Markaziy banki tomonidan quyidagi sabablarga ko‘ra ogohlantirilgan:
- bank nazoratiga oid iqtisodiy normativlar bajarilmaganligi;
- aktivlar bo‘yicha ehtimoliy yo‘qotishlarga qarshi yetarli miqdorda zaxiralar shakllantirilmaganligi;
- kredit hujjatlarini rasmiylashtirishda belgilangan tartiblarga to‘liq amal qilinmaganligi;
- amaldagi qonunchilik hujjatlariga muvofiq tijorat banklari ustav kapitali miqdoriga qo‘yilgan talablar bajarilmaganligi uchun (ustav kapitali 29 mlrd so‘mga kam shakllantirilgan);
Ma’lumot uchun, Support Level xorijiy kompaniyasining yagona ta’sischisi Olimjon Shodiyev hisoblanadi.
Avvalroq “O‘zagroeksportbank”ni Rossiya bankiga sotish bo‘yicha bitim bekor qilingani haqida xabar berilgandi.
Izoh (0)