АҚШда 2021 йилнинг январида Конгресс биносига қилинган ҳужум оқибатида ҳалок бўлган полиция зобити Брайан Сикникнинг қаллиғи Сандра Гарца Дональд Трамп ва икки намойишчи устидан судга мурожаат қилди. Бу ҳақда The Hill хабар берди.
Гарцанинг даъвосига кўра, полициячининг ўлими учун Трамп ва икки намойишчи — Жулина Кхатер ва Жорж Таниос «бевосита ва билвосита» жавобгар.
Суд жараёнида айтилишича, судланувчиларнинг хатти-ҳаракатлари Брайан Сикникнинг ўлимига сабаб бўлган клиник ҳолатга олиб келган. 6 январь кунги воқеаларда у икки марта юрак хуружига учраган, шундан сўнг, 7 январь куни касалхонада вафот этган.
Маълумот учун 2021 йил 6 январь куни АҚШ Конгресси аъзолари Дональд Трампнинг президентлик сайловларида мағлуб бўлганини тасдиқлаш учун йиғилган вақтда Трампнинг тарафдорлари Конгрессга бостириб кирган. Полиция бир неча соат ўтибгина намойишчиларни Капитолийдан ҳайдаб чиқаришга муваффақ бўлган. Ҳуқуқ-тартибот органлари ходимлари ўқотар қурол, дубинка, кўздан ёш оқизувчи газдан фойдаланган. Ҳодисада Капитолий хавфсизлик ходими билан биргаликда, беш киши ҳалок бўлган, 140 нафар полициячи яраланган.
Ҳужум олдидан Трамп 2020 йилги сайлов натижаларини тан олишдан очиқчасига бош тортган ва овоз бериш жараёнида кўплаб қонунбузарликларга йўл қўйилганини таъкидлаб, сайлов натижаларини қайта кўриб чиқишни талаб қилганди.
Кейинроқ Трампнинг ўзи Капитолийга ҳужумни қоралаб чиқди.
2022 йилнинг декабрь ойида АҚШ Конгресси Вакиллар палатасининг Капитолийга ҳужумни тергов қилиш бўйича сайловчи қўмитаси Дональд Трампга нисбатан жиноий иш қўзғатишни тавсия қилди.
Қўмита фикрича, Трампга қуролли исён, ёлғон гувоҳлик бериш учун, федерал ҳукуматга нисбатан фирибгарлик ва расмий жараёнга тўсқинлик қилиш учун тил бириктириш бўйича айбловлар қўйилиши керак.
Изоҳ (0)