Ukrainaga jangovar harakatlar oqibatida yetgan zarar 700 milliard dollarni tashkil etadi, bu summa mamlakat infratuzilmasiga hujumlar oqibatida ikki karra o‘sdi, deya ma’lum qildi bosh vazir Denis Shmigal vazirlar mahkamasi majlisida.
Yaqin orada Ukrainani Rossiya banklaridan musodara qilingan mablag‘lar hisobidan qayta tiklashni boshlash rejalashtirilmoqda, buning uchun maxsus hisobda 17 milliard grivna (462,5 million dollar) turibdi. Ustuvor maqsad vayron bo‘lgan uy-joylarni qayta tiklashdan iborat bo‘ladi, dedi Shmigal. Jamoat binolari, muhim infratuzilma obyektlarini qurish va ta’mirlash, vaqtinchalik ko‘chirilgan shaxslarni uy-joy bilan ta’minlash uchun budjetga 35,5 milliard grivna (952,3 million dollar) qo‘yilgan.
“Mamlakat ichida ustuvor vazifa investitsiya kiritish uchun maksimal darajada qulay sharoitlar yaratishdan iborat. Xususan, davlat-xususiy sheriklik loyihalarini tayyorlash va amalga oshirishni soddalashtitish. Shuningdek, investitsiyaviy loyihalarga talablarni kamaytirish”, — dedi Ukraina bosh vaziri.
U mamlakatni qayta tiklashni 2023-yil uchun o‘nta prioritetlardan biri deb atadi. Qolganlari esa Ukraina qurolli kuchlarini ta’minlash, Ukrainaning Yevroittifoq va NATO bilan integratsiyalashuvi, jangovar harakatlar faxriylarini qo‘llab-quvvatlash dasturi, energetikani diversifikatsiyalash, o‘quvchilarning xavfsizligi, markazlashmagan tizimga o‘tish islohotlarini davom ettirish, fond bozori va pensiya ta’minoti islohotidan iborat.
Sentabr boshida Shmigal Ukrainaga yetkazilgan to‘g‘ridan to‘g‘ri jismoniy zararni 326 milliard dollarga baholagandi, bu summani mamlakat hukumati Jahon banki ekspertlari bilan birgalikda tasdiqlab berishga muvaffaq bo‘lgan.
Izoh (0)