Донецкнинг Макеевка шаҳридаги Россия базасига 31 декабрь куни уюштирилган зарба Россия расмийларининг кескин танқидига сабаб бўлди. Бу эса президент Владимир Путиннинг обрўсига путур етказиши мумкин. Америка урушни ўрганиш институти (ISW) 2 январь кунги ҳисоботида бу бўйича маълумот берди.
Маълум қилинишича, Россия Мудофаа вазирлиги воқеа учун айбни Донецк халқ республикаси расмийлари ва сафарбар қилинганлар зиммасига юклашга ҳаракат қилиши мумкин. ДХР маълумотларига кўра, россиялик ҳарбий хизматчилар оператив хавфсизликни бузган ва шахсий мобил телефондан фойдаланган, бу эса Украинага базага аниқ зарба бериш имконини берган.
Бироқ Россия Мудофаа вазирлигининг зарбани тан олиши Россия ҳарбий қўмондонлигининг танқидига сабаб бўлди.‘Вагнер’ гуруҳига алоқадор ҳарбий блогерларнинг айтишича, Россия ҳарбий қўмондонлиги юзлаб аскарларни бир жойда тўплаш орқали Украина кучларига зарба беришни осонлаштирган.
Бошқа блогерларнинг таъкидлашича, Россия қўмондонлиги сўнгги 11 ой ичида бундай ҳужумларга гувоҳ бўлган, аммо бепарволик қилган.
ISW юқорида келтирилган муваффақиятсизликлар Путиннинг ҳарбийларни тинчлантиришга қаратилган саъй-ҳаракатларини мураккаблаштиришини таъкидлади.
«Путиннинг танқидларга жавоб бера олмаслиги ва Россия ҳарбий кампаниясидаги камчиликларни тўғрилай олмаслиги унинг амалий ҳарбий раҳбар сифатидаги ишончига путур етказмоқда», — дея хулоса қилган экспертлар.
Эслатиб ўтамиз, Янги йил арафасида Россия армиясининг сафарбар қилинган аскарлари жойлашган Макеевкага ракета зарбалари берилган. Украина томони ҳодиса оқибатида 400 га яқин ҳарбий ҳалок бўлгани, 300 нафари яраланганини хабар қилган.
Россия Мудофаа вазирлиги Макеевкадаги ҳарбийлар жойлаштирилган жойга HIMARS тизими ёрдамида зарба берилганини айтиб, ҳужумда 63 нафар аскар ўлганини маълум қилган.
Изоҳ (0)