Qurilish vazirligi tomonidan 2022-yilda qanday ishlar amalga oshirildi?

Yangi O‘zbekistonning 2022—2026-yillarga mo‘ljallangan Taraqqiyot strategiyasini “Inson qadrini ulug‘lash va faol mahalla yili”da amalga oshirishga oid davlat dasturi ijrosi yuzasidan belgilangan vazifalar ham bajarilib, barcha amalga oshirilgan ishlar targ‘iboti OAV orqali doimiy tarzda jurnalist va blogerlar bilan hamkorlikda amalga oshirildi.

O‘zbekiston Respublikasi prezidentining 2022-yil 28-yanvardagi 60-son farmoni bilan tasdiqlangan Yangi O‘zbekistonning taraqqiyot strategiyasini amalga oshirishga oid davlat dasturida Qurilish vazirligiga jami 21 ta vazifa yuklatilgan.

Hisobot davrida Qurilish vazirligi tomonidan sohani rivojlantirish va islohotlarni chuqurlashtirish bo‘yicha quyidagi tizimli chora-tadbirlar amalga oshirildi.

O‘zbekiston Respublikasi prezidentining 2022-yil 23-sentabrdagi “Respublikada kapital qurilish sohasida buyurtmachi xizmati faoliyatini takomillashtirish chora-tadbirlari to‘g‘risida” PQ-378-son qarori qabul qilindi.

Mazkur qaror bilan quyidagilar belgilandi:

2023-yil 1-yanvardan boshlab Maktabgacha ta’lim, Xalq ta’limi, Oliy va o‘rta maxsus ta’lim, Sog‘liqni saqlash, Madaniyat hamda sportni rivojlantirish vazirliklari huzuridagi buyurtmachi xizmatlari va ularning hududiy filiallari hamda Uy-joy kommunal xizmat ko‘rsatish vazirligi huzuridagi buyurtmachi xizmatining hududiy filiallari tugatildi, shuningdek, ularning funksiya va vakolatlari mahalliy hokimliklar huzuridagi “Yagona buyurtmachi xizmati” injiniring kompaniyalariga yuklatildi:

• buyurtmachi xizmatlarining faoliyati Iqtisodiy taraqqiyot va kambag‘allikni qisqartirish vazirligi tomonidan muvofiqlashtirilishi belgilandi;
• loyiha hujjatlari va qurilish ishlari sifatini oshirish hamda zamonaviy loyiha boshqaruvi tizimini yaratish maqsadida injiniring kompaniyalarining shtat jadvaliga loyiha boshqaruvi bo‘yicha mutaxassis, loyiha arxitektori, loyiha muhandisi lavozimlari kiritiladi;
• har bir hududda 10 milliard so‘mdan yuqori bo‘lgan, qurilish va (yoki) rekonstruksiya qilish ishlari 2023-yil 1-yanvardan boshlanadigan kamida 10 ta obyektda loyiha hujjatlarini ishlab chiqishda konsalting xizmatlari, loyiha boshqaruvi xizmatlari hamda texnik nazorat xizmatlarini ko‘rsatish davlat xaridlari to‘g‘risidagi qonunchilikka muofiq, tanlab olinadigan tadbirkorlik subyektlari, shu jumladan xorijiy tashkilotlar tomonidan amalga oshirilishi tartibi joriy qilinadi.
• 2023-yil 1-aprelga qadar “Shaffof qurilish” milliy axborot tizimida texnik nazorat ishlarini amalga oshiruvchi tadbirkorlik subyektlarini baholash platformasini joriy qilinadi. Bunda, reyting platformasi uchun loyihalardagi maqbullashtirish, qurilish muddatini qisqartirish, sifatini oshirish, xavfsizligini ta’minlash mezonlari asos qilib olinadi;
• 2023-yil 1-yanvardan boshlab buyurtmachi xizmatlari texnik topshiriqlar hamda unga qo‘yiladigan funksional va ekspluatatsiya talablarini idoraviy qurilish normalariga asosan ishlab chiqadi va ekspluatatsiya qiluvchi tashkilotlar bilan kelishadi;
• buyurtmachi xizmatlariga texnik topshiriq, eskiz loyihasi, unga qo‘yiladigan funksional va ekspluatatsiya talablarini ishlab chiqishni autsorsing shartnomalari asosida tadbirkorlik subyektlarini jalb qilgan holda amalga oshirish vakolati beriladi;
• 2023-yil 1-yanvardan boshlab ommaviy ahamiyatga ega noyob va alohida muhim obyektlarning eskiz loyihasini ishlab chiqish uchun buyurtmachi xizmati tomonidan arxitektura tanlovini o‘tkazish bo‘yicha majburiy tartib belgilanadi.
• 2023-yil 1-martdan boshlab markazlashgan manbalar hisobidan moliyalashtiriladigan obyektlarning smeta qiymatini aniqlash Davlat statistika qo‘mitasi, Davlat soliq qo‘mitasi hamda boshqa vazirlik va idoralarning ma’lumotlar bazalarini integratsiya qilgan holda, Qurilish vazirligi tomonidan joriy etiladigan “Qurilish resurslari milliy klassifikatori” elektron platformasi asosida amalga oshiriladi;
• bino va inshootlarga qo‘yiladigan minimal funksional va ekspluatatsiya talablarini, shu jumladan, zamonaviy resurs tejovchi texnologiyalarni joriy etish va ushbu obyektlardan foydalanish xarajatlarini optimallashtirishga doir talablarni, idoraviy qurilish normalarini Qurilish vazirligi bilan kelishgan holda tasdiqlab boriladi.