Qashqadaryoda onlayn aviachipta sarlavhasi ostida soxta e’lonlar joylashtirib, firibgarlik qilib kelgan fuqaroga jinoyat ishi qo‘zg‘atildi. Bu haqda IIV Kiberxavfsizlik markazi xabar qildi.
Ma’lum qilinishicha, Farg‘ona viloyati Marg‘ilon shahrida istiqomat qiluvchi fuqaro Yo.M. ariza bilan murojaat qilib, uning o‘g‘li Rossiyaga mavsumiy ishchi bo‘lib ketmoqchiligi, ammo Telegram’da noma’lum shaxs unga onlayn aviachipta olib berishiga ishontirib, 3,5 million so‘m pulini bank kartasiga o‘tkazib olganidan so‘ng g‘oyib bo‘lganini bildirib, pullarni qaytarib olishda yordam va noma’lum shaxsga nisbatan qonuniy chora ko‘rishni so‘ragan.
Olib borilgan tezkor-qidiruv tadbirlari natijasida firibgarlik yo‘li bilan pullarni o‘zlashtirgan shaxs Qashqadaryo viloyati Kasbi tumanida yashovchi 1997-yilda tug‘ilgan Sh.A. ekani aniqlangan.
U turli ijtimoiy tarmoqlarda onlayn aviachipta sarlavhasi ostida soxta e’lonlar joylashtirib, firibgarlik yo‘li bilan fuqarolarning pullarini o‘zlashtirgani ma’lum bo‘lgan.
Sh.A.ga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari olib borilmoqda.
Izoh (0)