Rossiya armiyasi o‘q-dorilar jiddiy tanqisligini boshdan kechirmoqda — ISW

Rossiyaning Ukrainadagi armiyasi artilleriya o‘q-dorilari jiddiy tanqisligini boshdan kechirmoqda. Snaryadlar yetishmasligi natijasida istilochilar Baxmut ostonalaridan siljiy olmayapti. Bu haqda Urushni tadqiq qilish instituti (ISW) hisobotida aytiladi.

RF, katta ehtimol bilan, boshqa frontlarda ham hujum yoki mudofaa operatsiyalariga qodir bo‘lmaydi. Bundan tashqari, Belarus tomonidan qayta hujum ehtimoli kam, deb hisoblaydi ISW.

Xususan, Ukraina Harbiy razvedka bosh boshqarmasi boshlig‘i Kirill Budanovning 31-dekabrdagi bayonoti keltirib o‘tildi. U Rossiyaning Ukrainadagi armiyasi artilleriya bilan bog‘liq jiddiy muammolarga duch kelayotganini aytib, bu muammolar mart oylariga kelib, yanada sezilarliroq tus olishini taxmin qildi.

Budanov o‘z bayonotini shu bilan izohladiki, Rossiya qo‘shinlari avvalroq kuniga o‘rtacha 60 mingta artilleriya snaryadlarini qo‘llagan bo‘lsa, endilikda 19—20 mingta ishlatmoqda.

Shuningdek, istilochilar “maxsus operatsiya”ni qandaydir tarzda qo‘llab-quvvatlab turish uchun Belarusdagi harbiy omborlarda qolgan barcha artilleriya o‘q-dorilarini chiqarib ketgan.

Shu bilan birga, Ukraina razvedkasi hisob-kitoblari Britaniya razvedkasiniki bilan mos kelmoqda. Buyuk Britaniya Mudofaa vazirligi 24-dekabr kuni Rossiya Ukrainada katta ko‘lamli hujum operatsiyalarini, hattoki, uzun front chizig‘i bo‘ylab mudofaa operatsiyalarini qo‘llab-quvvatlash uchun o‘q-dorilar zaxirasiga ega emasligini ma’lum qilgan edi, bunday operatsiyalar uchun ularga katta sonli snaryadlar va raketalar kerak bo‘ladi.

Shundan kelib chiqib, tahlilchilar aytishicha, Baxmut ostonalaridagi janglar avvalgidek shiddatli bo‘lmaydi.

“ISW hisob-kitoblariga ko‘ra, o‘q-dorilar sonining cheklanganligi Rossiya kuchlariga yaqin kelajakda Baxmut atrofida operatsiyalarning yuqori sur’atini saqlab turishga qisman xalal beradi. Rossiya qurolli kuchlari artilleriya o‘q-dorilari zaxiralarining tugashi, katta ehtimol bilan, ularning Ukrainaning boshqa joylarida ham faol operatsiyalar olib borish imkoniyatiga ta’sir o‘tkazadi”, — deyiladi hisobotda.