«Бугун вафот этган қирол Пеленинг саргузаштига кўтаринки руҳ ва муҳаббат ҳамроҳлик қилди. Севги, севги ва севги. Абадий». Пеленинг вафотидан кейин унинг ижтимоий тармоқдаги саҳифасида шундай жумлалар қолдирилди.
Бутун дунё «футбол қироли» билан хайрлашмоқда. «Дарё» уларнинг асосийларини битта саҳифага жамлади.
Пеле фаолиятидаги асосий клуб ҳисобланган «Сантос» олтин тож суратини жойлади ва изоҳга битта сўз ёзди: «Абадий».
Килиан Мбаппе: «Футбол қироли бизни тарк этди, бироқ унинг мероси ҳеч қачон унутилмайди. Абадий ором ол, Қирол».
Криштиану Роналду: «Бразилия халқи, хусусан, жаноб Эдсон Арантис ду Насиментунинг оиласига ҳамдардлик билдираман. Бутун футбол аҳли ҳис қилаётган оғриқни ифодалаш учун абадий қирол Пелега шунчаки ‘хайр’ дейиш камлик қилади. Бир неча миллион кишини илҳомлантирган, кеча, бугун ва бутун келажак эталони».
Эрлинг Ҳоланд афсонага битта гап билан таъриф берди: «Замонавий футболда ниманики кўрсангиз, қачонлардир уни биринчи бор Пеле амалга оширган бўлади».
Гарет Бэйл Пелега қуйидаги таърифни берди: «Кўплар футболни нима сабабдан бу қадар яхши кўришининг сабаби».
Лионель Месси қисқароқ қилди: «Абадий ором ол, Пеле».
Гари Линекер: «Пеле вафот этди. Футболчилар ичида энг иқтидорлиси ва одамлар ичида энг хушчақчағи. У шундай футбол намойиш этганки, фақат танланганлардан бир нечаси унга яқин кела олган».
Бразилиялик футболчиларнинг деярли барчаси мамлакат афсонаси билан видолашди.
Роналдо: «Сенинг давомчинг бўлиш улкан шараф, дўстим.
Сенинг иқтидоринг — ҳар бир футболчи ўрганиши керак бўлган мактаб. Меросинг авлодлар чегарасидан чиқиб кетади ва бунинг эвазига сен умрбод яшайсан. Бугун ва ҳар доим биз мени қутлаймиз. Раҳмат сенга, Пеле».
Бразилия терма жамоаси ва «Бунёдкор» собиқ ҳужумчиси Ривалдо: «Пеле Бразилияда туғилгани учун яратгандан миннатдорман. Унинг майдондаги ҳаракатлари сабаб бизнинг футбол дунёда ном қозонди ва ҳеч қачон унутилмайди.
Иккита Жаҳон Чемпионатида унинг табаррук 10-рақами остида тўп сурганимдан фахрланаман. Қирол Пеле, сизнинг меросингиз абадий».
Каземиро: «Абадий ором ол, Қирол Пеле. Бразилия ва футболга берган улуғворлик учун ташаккур. Сенинг меросинг абадий».
Кафу: «Бугун акамни йўқотдим. У шунчаки фоний дунёни тарк этиб, адоғи йўқ боқий дунёга кетди. Кўришамиз, Пеле».
Неймар ҳам жуда чиройли хайрлашди: «Пелега қадар 10-рақам шунчаки сон эди. Қачонлардир шундай деб ўқигандим. Бироқ бу ажойиб иқтибос тўлиқ эмас. Мен Пелега қадар футбол оддий спорт эди, деган бўлардим. Пеле ҳаммасини ўзгартирди.
У футболни санъат ва кўнгилочар машғулотга айлантирди. У қашшоқ қоратанлиларнинг овози бўлди. Яна бир муҳим жиҳат: у бутун дунёга Бразилияни намойиш қилди. Футбол ва Бразилиянинг савияси Қирол сабаб ўсди. У кетди, бироқ унинг сеҳри қолади. Пеле абадий!».
Футбол клублари ҳам афсона билан хайрлашди.
«Реал Мадрид»: «Пеленинг оиласи, яқинлари, клублари, Бразилия футбол конфедерацияси, мамлакат ва дунёдаги барча футбол ишқибозларига ҳамдардлик билдирамиз.
Пеле бу спортни севган барчанинг ёдида абадий қолади. Унинг мероси Пелени футбол оламидаги энг буюклардан бирига айлантиради».
«Пахтакор»: «Футбол қироли Пеленинг вафоти муносабати билан унинг оиласи, дўстлари ва жаҳон футбол аҳлига ўз таъзиямизни изҳор қиламиз. Футболни севишга чорлаган, ўйинни ўзгартирган инсон сифатида унинг амалга оширган ишлари ҳеч қачон унутилмайди».
«Арсенал»: «Пеленинг ўлимидан чуқур қайғудамиз. Клуб сифатида 1981 йил уни «Ҳайбери»да қабул қилганимиздан ғурурланамиз. Биз бутун умр қадрлайдиган хотира. Бизнинг хаёлимиз бугун футбол ҳамжамияти ва Пеленинг яқинлари билан бирга».
«ПСЖ»: «Футболнинг абадий қироли. Бу қайғули вақтда Пеленинг яқинлари, оиласи ва бутун Бразилия халқига ҳамдардлик билдирамиз. Ҳаммаси учун раҳмат».
ЎФА ҳам бу воқеани эътиборсиз қолдирмади:
«Ўзбекистон футбол ассоциацияси Пеленинг оила аъзолари, яқинлари, Бразилия футбол конфедерацияси ҳамда бутун дунёдаги барча футбол мухлисларига ҳамдардлик билдиради.
Пеле ҳақидаги хотира ушбу спорт турини севувчиларнинг қалбида абадий қолади ва унинг мероси, шубҳасиз, жаҳон футболининг буюк дурдоналаридан бирига айланади».
Нафақат футбол олами, бошқа спортчилар ҳам Пелени сўнгги йўлга кузатмоқда.
Формула-1 бўйича етти карра жаҳон чемпиони Льюис Ҳемилтон: «Бугун афсонани йўқотдик. Ўз иқтидоринг, даҳолигинг ва севгингни биз билан бўлишганинг учун катта раҳмат. Пеленинг мероси бизни абадий илҳомлантиради».
Афсонавий боксчи Майк Тайсон футбол қироли билан қандай танишганини ёдга олди: «Ёшим 21 да эди, мен буюклар буюги билан учрашишни орзу қилардим. Пеле тоза қалбли инсон эди ва бошқалар ҳақида ҳеч қачон ёмон гап гапирмасди».
Сиёсий арбоблар ҳам четда қолмади.
АҚШ президенти Жо Байден: «Дунёни бирлаштирувчи спорт учун Пеленинг камтар ҳаваскордан футбол афсонаси мақомигача босиб ўтган йўли — имкониятлар ҳақидаги ҳикоя.
Бугун Жилл (Байденнинг рафиқаси — изоҳ «Дарё») иккимизнинг ўй-хаёлларимиз унинг оиласи ва Пелени яхши кўрган барча билан бирга».
Франция президенти Эммануэль Макрон: «Ўйин. Қирол. Абадийлик».
АҚШнинг 44-президенти Барак Обама: «Пеле футбол тарихидаги буюк ўйинчилардан бири эди. У спорт одамларни бирлаштириш мумкинлигини исботлади».
Мавзуга доир:
Изоҳ (0)