“Dehqon bozorlaridagi Yangi yil bayrami yarmarkalarida go‘sht 55-60 ming so‘mdan sotilmoqda. Zaxiramiz yetarli, tanqislik bo‘lmaydi” — Veterinariya qo‘mitasi

Yangi yil bayrami arafasida go‘sht va go‘sht mahsulotlariga bo‘lgan talab ortadi. Mazkur jarayonda go‘sht mahsulotlari narxining sun’iy ko‘tarilishi va tanqisligining oldini olish borasida qanday ishlar qilinayotgani yuzasidan “Daryo” muxbiri mas’ullardan izoh oldi.

“Parrandasanoat” uyushmasi raisining birinchi o‘rinbosari Ulug‘bek Ahmedovning ma’lum qilishicha, aholining parranda mahsulotlariga bo‘lgan ehtiyojini ta’minlash, arzon va sifatli mahsulotlarni yetkazib berish uchun respublikaning har bir dehqon bozorida arzonlashtirilgan yarmarkalar faoliyat olib bormoqda.

“Viloyatlar kesimida bozorlar taqsimlab berilgan. O‘sha hududdagi parrandachilik korxonalarini yarmarkalarga jalb qilish ishlari olib borildi. Har bir korxona o‘zi ishlab chiqargan mahsulotini yarmarka peshtaxtalariga joylashtirib sotmoqda. Yetarli miqdorda tovuq go‘shti va tuxum zaxiramiz bor”, — dedi Ulug‘bek Ahmedov.

Toshkent shahar veterinariya va chorvachilikni rivojlantirish boshqarmasi mas’ul xodimi O‘tkir Otaboyevning aytishicha, Yangi yil yarmarkalarida go‘sht va go‘sht mahsulotlari bilan ta’minlashga Veterinariya va chorvachilikni rivojlantirish davlat qo‘mitasi mas’ul etib belgilangan.

“Bozorlarimizda mayda va yirik shoxli mol go‘shtlari yetarlicha va zaxirasi ham yaratilgan. Hozirda yirik shoxli mol go‘shti 55 ming so‘m, mayda shoxli mol go‘shti esa 60 ming so‘mdan sotilmoqda. Chorvachilik fermerlarida go‘sht zaxiralari yetarli, tanqislik bo‘lmaydi”, — dedi O‘tkir Otaboyev.

Qo‘shimcha qilinishicha, mas’ul idoralardan tuzilgan komissiyalar narxlarning sun’iy ko‘tarilishining oldini olish borasida monitoring olib bormoqda.