“Aholiga 120 xil dori bepul tarqatilmoqda” — shifokor 2022-yilda poliklinikalardagi o‘zgarishlar haqida

Yunusobod tuman tibbiyot birlashmasi rahbari Shoira Abdusattorova “Daryo” muxbiri bilan suhbatda poliklinikalarda bajarilayotgan ishlar va bepul tarqatilayotgan dorilar haqida ma’lumot berdi.

Bepul berilayotgan 120 xil dori

Prezident qarori va Sog‘liqni saqlash vazirligi buyrug‘i bilan 2022-yil fevraldan boshlab 120 xil dori aholiga bepul tarqatilmoqda. Buning uchun barcha oilaviy poliklinikalarda yetarli dori-darmonlar zaxirasi mavjud.

Masalan, poliklinikamizning birinchi qavati dorixona hisoblanadi. Har bir oilaviy shifokor, tor soha mutaxassisi retsept asosida 120 xil dori-darmonni yozish va bemor uchun ushbu dorixonadan bepul olish imkoniyatiga ega. Oilaviy poliklinikaga murojaat qilgan barcha shaxslarga kasalligi yuzasidan mavjud barcha dorilar bilan bepul ta’minlanadi.

Bugungi kundagi dori-darmon zaxiramiz yuz ming nafardan ortiq bemor uchun 2024-yil iyun oyigacha yetadi. Ya’ni hozir Yunusobod tumanida 364 ming nafar aholi istiqomat qiladi. Shundan 30 foizi surunkali kasalliklar bilan og‘rigan taqdirda ularni bir yarim yil davomida bemalol doimiy dori-darmon bilan bepul ta’minlay olamiz.

“Gemodializga muhtojlarga ham dorilar bor”

Tumanimizda to‘qqizta oilaviy poliklinika va bitta markaziy ko‘ptarmoqli oilaviy poliklinika mavjud bo‘lib, ularda kunlik berilayotgan dori-darmonlarning elektron bazasi ham yuritiladi.

Bugungi kunda poliklinikaga biror ona bolasi bilan shamollash holati yuzasidan kelsa, ularni asoratsiz davolash uchun barcha imkoniyatimiz bor. Sababi virus, yo‘tal, isitmaga qarshi dorilarimiz yetarli. Shuningdek, surunkali kasallikka chalingan, kardiologik endokrinologik skrininglarda aniqlangan kasalligi bor bemorlarni ham doimiy nazorat ostida davolash uchun barcha dori-darmonlar mavjud.

Gemodializga muhtoj bemorlar uchun ham dori vositalari zaxirasi mavjud. Ya’ni gemodializ oluvchi bemorlarni bepul dorilar bilan bemalol ta’minlay olamiz.

“Shahar shifoxonalariga bo‘lgan yuklama kamaymoqda”

Aytish mumkinki, bir kunda eng kichik poliklinikamizda o‘rtacha 200 nafarga yaqin bemorlarga dori berish imkoniyatiga egamiz. Hozirda barcha oilaviy poliklinikalarimizda tibbiy brigadalar tashkil etilgan. Unda bitta oilaviy shifokor, ikkita patronaj hamshirasi va amaliyotchi hamshira faoliyat yuritmoqda.

Patronaj hamshirasi surunkali yotoqli yoki poliklinikaga chiqish imkoniyatiga ega bo‘lmagan bemorlarga uy sharoitida, patronaj vaqtida dori-darmonni bepul olib borib berish imkoniyatiga ega. Buning uchun ham yetarli dori-darmon zaxiralari bor.

Shifoxonamiz ikki smenada soat 8:00 dan 20: 00 gacha faoliyat yuritmoqda. Barcha zaruriy dori vositalari ta’minlangan holda bemorlarni ambulator sharoitida davolash imkoniyatiga ega bo‘lganimiz natijasida shahar shifoxonalariga bo‘lgan yuklamani 10-15 foizga kamaytiryapmiz.