Ўзбекистон ва Афғонистон темир йўл маъмурияти раҳбарлари музокара ўтказди

Термиз шаҳрида 26—30 декабрь кунлари Ўзбекистон ва Афғонистон вакиллари ўртасида темир йўл масалалари юзасидан учрашувлар бўлиб ўтди.

Учрашув доирасида икки томонлама ҳамкорликни ривожлантириш, Афғонистонга темир йўл орқали юкларни узлуксиз етказиш мақсадида Ҳайратон станциясида хизмат кўрсатишни янада такомиллаштириш масалалари муҳокама қилинди.

Қўшни давлат вакиллари Ўзбекистон томонидан афғон халқи учун кўрсатаётган инсонпарварлик ёрдами, инфратузилмавий лойиҳаларда қўллаб қувватлаши, хусусан, Термиз—Мозори-Шариф—Кобул—Пешовар темир йўл лойиҳасини амалга ошириш бўйича кўрсатилаётган кўмак, афғон мутахассисларини ўқитиш ва малакаларини ошириш бўйича амалга ошираётган самарали ишларини алоҳида таъкидлаб, ўз миннатдорчилигини билдирди.

«Ўзбекистон темир йўллари» АЖнинг «Sogdiana trans» ШК томонидан Ҳайратон темир йўл станциясининг тажрибасидан келиб чиқиб  техник-хизмат ишларига Афғонистон томонини босқичма босқич жалб қилиш бўйича ҳаракатлар режаси келишиб олинди. Шу билан бирга, халқаро юк ташувларни амалга ошириш «Sogdiana trans» ШК томонидан давом этиши тўғрисида келишилди. Бўлиб ўтган учрашувлар якуни бўйича икки мамлакат темир йўл маъмурияти раҳбарлари ўртасида учрашув баёни имзоланди.

Мавзуга доир: Ўзбекистон Ҳайратон—Мозори Шариф темир йўлини бошқариш ҳуқуқидан маҳрум бўлгани ҳақидаги хабарлар рад этилди