Stressga tushgan odam juda qayg‘uli ko‘rinadi: ma’yus, terisi qurigan, qizargan, yallig‘lanish va qora dog‘lar og‘ir ish kunining natijasidir. Shubhasiz, stress organizmga bir qarashdayoq ko‘zga tashlanadigan belgilar bilan ta’sir qiladi. Masalan, ruhiy salomatlikdan tashqari jiddiy teri muammolariga ham olib kelishi mumkin, deb yozadi Elle.
Terining qurishi
Surunkali stressning oqibatlaridan biri epidermisdan ortiqcha suyuqlik yo‘qotilishidir. Terining suvsizlanishi yog‘ bezlarining buzilishiga olib keladi: bemorlarning yuzida yog‘, yallig‘lanish va og‘riqli his paydo bo‘ladi. Terini qayta jonlantirish uchun lipid to‘sig‘ini tiklash, lipid sintezi jarayonini boshlash kerak. Himoya plyonkasini yaratadigan tabiiy yog‘lar, kislotalar (gialuron), yumshatuvchi (yog‘lar) asosidagi mahsulotlar bilan terini parvarishlash lozim.
Terining qizarishi
Yuzdagi qon tomir tarmog‘ining spazmi yoki ortiqcha bo‘shashib ketishi surunkali stressning yana bir natijasidir. Teridagi qizarish kortizol — stress gormoni ta’siri tufayli paydo bo‘ladi. Muntazam stress vaqtida tomirlar ingichka bo‘lib, ba’zan hatto yorilib ketadi. Uzoq muddatdli stress yallig‘lanishli teri kasalliklarining rivojlanishiga olib kelishi mumkin. Yechim sifatida nozik teri uchun kapillyar-himoya va tinchlantiruvchi xususiyatlarga ega mahsulotlar tavsiya etiladi. Mutaxassisning fikriga ko‘ra, bunday muammolarning oldini olish uchun sariq spektrli LED protseduralariga e’tibor qaratish lozim: u teriga 1,2 mm chuqurlikka kirib, qon tomirlari devorlarini tinchlantiradi va mustahkamlaydi.
Teri rangining xiralashishi, qora dog‘lar va shish
Agar kortizol terini qizartirib yuborsa, adrenalin, aksincha, kapillyar spazmni keltirib chiqaradi va kislorod almashinuvini buzadi. Teri xuddi muzlab qolganga o‘xshaydi. Surunkali stress natijasida yuz rangi xira bo‘lib qolishi ajablanarli emas. Limfa tizimi ham stress gormonlarining ta’siri ostida qoladi. Funksiyalarining buzilishi tufayli to‘qimalarda suyuqlik saqlanib qoladi, buning natijasida yuzning shishishi rivojlanishi va ko‘z atrofidagi qora doiralar paydo bo‘lishi mumkin.
Terining erta qarishi
Stress hatto yuzning konturlari va ovaliga ham salbiy ta’sir qiladi: bemorda mushaklarning gipertonusligi yoki qisqarishi paydo bo‘lishi mumkin. Gap shundaki, dam olish paytida mushak tolalari ovalni saqlashga yordam beradi. Gipertonus holatida ular yuzni pastga tortishni boshlaydi. Stress ostida nafaqat yuzda, balki butun organizmda ajinlar paydo bo‘lish xavfi ortadi.
Gipertonusni tuzatish va oldini olish botulinum terapiyasi, yuz va bo‘yin hududini massaj qilish, shuningdek, umumiy tana massaji yordamida amalga oshiriladi. Uyda muntazam ravishda yuzni qo‘llar yoki massaj cho‘tkasi bilan uqalash mumkin.
Izoh (0)