Birlashgan Millatlar Tashkiloti bosh kotibi Antoniu Guterrish Armaniston va Tog‘li Qorabog‘ni bog‘lovchi yagona yo‘l —Lochin yo‘lagi atrofidagi vaziyatdan xavotir bildirdi va tomonlarni harakat erkinligini ta’minlashga chaqirdi. Bu haqda bosh kotib devoniga tayanib, “TASS” xabar bermoqda.
“Bosh kotib Lochin yo‘lagi atrofidagi vaziyatning rivojlanishini xavotir bilan kuzatib bormoqda va tomonlarni erishilgan kelishuvlarga muvofiq keskinlikni pasaytirishga hamda yo‘lak bo‘ylab xavfsizlik va erkin harakatlanishni ta’minlashga chaqirmoqda”, — deyiladi hujjatda.
Bundan tashqari, Guterrish mintaqani tinch yo‘l bilan tartibga solish bo‘yicha davom etayotgan sa’y-harakatlarni qo‘llab-quvvatlashini tasdiqlagan.
Lochin yo‘lagi Ozarbayjonning Lochin viloyatidan o‘tgan. Bu Armaniston va Tog‘li Qorabog‘ni bog‘laydigan olti kilometrlik avtomobil yo‘li.
12-dekabr kuni o‘zini ekologiya faollari deb tanishtirgan ozarbayjonlik bir guruh noma’lum shaxslar Lochin yo‘lagini to‘sib qo‘ygani xabar qilindi. Armaniston tomoni Boku Uch tomonlama bayonotning oltinchi bandini qo‘pol ravishda buzganini ta’kidladi. Bandga ko‘ra, “Lochin yo‘lagi Rossiya tinchlikparvar kuchlari nazorati ostida bo‘ladi, Ozarbayjon respublikasi esa fuqarolar, transport vositalari va yuk mashinalarning Lochin yo‘lagi bo‘ylab harakatlanishi xavfsizligini kafolatlaydi”.
Yo‘lak to‘sib qo‘yilganidan keyin tan olinmagan Tog‘li Qorabog‘ respublikasi Xavfsizlik kengashi Rossiya tinchlikparvar kuchlari qo‘mondonligiga murojaat qildi.
Izoh (0)