Франциянинг Озарбайжондаги элчиси Анн Боён мамлакат Ташқи ишлар вазирлигига чақирилди ва унга норозилик нотаси топширилди, деб ёзади «Коммерсантъ».
28 декабрь куни Франция парламенти вакиллари президент Эммануэль Макронга хат юбориб, Арманистон-Озарбайжон низосига аралашишни сўраган, чунки Озарбайжон гуманитар ҳалокат юзага келиши учун хавф яратганини айтганди. Боку Парижнинг айбловларини туҳмат ва асоссиз деб атади.
Озарбайжон ТИВ Франция парламенти мактубини мамлакатга қарши қаратилган чора-тадбирларнинг давоми деб баҳоланди.
Франциялик сиёсатчиларнинг қўшма мактубида айтилишича, Озарбайжоннинг хатти-ҳаракатларига қараганда, низо кескинлашишда давом этади ва гуманитар ҳалокатга олиб келади. Мансабдорлар фикрича, Боку ҳарбий жиноятларни амалга оширишда, маданий меросни йўқ қилишда ва келишувларни бузадиган бошқа ҳаракатларни амалга оширишда давом этади. Шу муносабат билан Франция Озарбайжонни қоралаши ва Арманистонга ёрдам кўрсатиши кераклиги айтилади.
24 декабрь куни Эммануэль Макрон Озарбайжон президенти Илҳом Алиевни 2020 йил 9 ноябрда имзоланган ўт очишни тўхтатиш ҳақидаги битимга риоя қилишга ҳамда Арманистон ва Тоғли Қорабоғни боғловчи ягона йўл — Лочин йўлаги бўйлаб ҳаракатланишга рухсат беришга чақирганди. Ушбу йўналиш 12 декабрь куни озарбайжонликлар гуруҳи томонидан тўсиб қўйилган. Алиев бунга жавобан Боку йўлакни фуқаролар ва гуманитар эҳтиёжлар учун ёпиб қўймаганини айтди.
Изоҳ (0)