Afg‘onistonning Panjshir viloyati aholisi “Tolibon” ayollarga qo‘yilgan cheklovlarni kuchaytirganini, xususan, burqa kiyish majburiy etib belgilanganini ma’lum qildi. Bu haqda Afghanistan International xabar berdi.
Ma’lum qilinishicha, hududda burqa kiyilmagan taqdirda, ayollarning erkin yurishiga yo‘l qo‘yilmayapti va ularning yonidagi odamlar ham haqorat va zo‘ravonlikka duchor bo‘lmoqda.
Mahalliy manbalarga ko‘ra, viloyat bo‘ylab yangi nazorat punktlari tashkil etilgan bo‘lib, ular burqa kiymagan ayollarni nishonga olmoqda.
“Panjshirda ayollar nazorat punktlarida avtomobillardan tushirilib, burqa kiymagani uchun haqorat qilinmoqda. Hatto bunday ayollarni tashigan haydovchilar ham kaltaklanganiga guvoh bo‘ldik”, dedi viloyat aholisi vakillaridan biri.
Roxxa tumanida yashovchi boshqa bir guvoh ham so‘nggi kunlarda “Tolibon” kiyim-kechak talablariga amal qilmagan ayollarni to‘xtatayotgani va jamoatchilikni qo‘rqitayotganini tasdiqlagan. Aholining aytishicha, kiyinish bo‘yicha reydlar bilan birga, “Tolibon” mobil telefonlardan foydalanishni ham cheklashga urinmoqda. Erkaklar ham, ayollar ham smartfon olib yurmaslik haqida ogohlantirilgan va so‘nggi kunlarda bu ogohlantirishlar qo‘pol tus olgan.
“Biz Kobulga borishni rejalashtirgan edik, ammo guruhimizdagi ayollar burqa kiymagani sababli, ular to‘liq hijobda bo‘lishiga qaramay, yo‘limizni to‘sishdi”, dedi yana bir mahalliy aholi vakili.
Mahalliy manbalar “Tolibon” bu yangi choralarni 7-avgustdan boshlab qo‘llay boshlaganini va vaziyat kun sayin og‘irlashayotganini aytmoqda. Panjshirda kuzatilgan bu cheklovlar yaqinda Kobulga ham yetib kelgan — poytaxtda harakat rasmiylari “noto‘g‘ri hijob” kiyishda ayblangan ayollarni hibsga olgani xabar qilingan.
Izoh (0)